Normu nutaaq
Ullunik ataatsimiiffissanik allannguineq
Kommunalbestyrelsimi ataatsimiinnissaq aalajangersimasumillu qulequtaqarluni sammisaqarnissaq 2012-imi aggustip 27-ani 28-anilu pisussatut pilersaarutaasut aggustip 20-ani 21-anilu pisussanngorlugit siuartinneqarput.
Matusinissamut killiffik
Kommunalbestyrelsip ataatsimiinnerani kommunalbestyrelse ilisimatinneqarpoq Kangilinnguani sakkutooqarfiup matunissaanut killiffik aammalu Nuummi Arktisk Kommandop pilersinnissaanut killiffimmik tunngasumik.
Malimmi siulersuisut ilaasortartaarput
Naluttarfik Malimmi siulersuisuni inuttaqanngitsoq inuttalerniarlugu Nikoline Ziemer IA-meersoq Kommunalbestyrelsimit toqqarneqarpoq.
Peqqinnissaq pillugu politikkikkut suleqatigiinneq
Namminersorlutik Oqartussat inuiaqatigiit peqqinnissaat pillugu maajip arfineq pingajuani qulingiluaanilu ataatsimiititsineranni, kommunini sisamaasuni borgmesterit Naalakkersuisoq Agathe Fontainimit ataatsimeeqatigineqarput, peqqinnissaq pillugu qaninnerusumik suleqatigiinnissaq oqaluuserineqarluni.
KANUKOKA-mi politikkikkut ataatsimiititaliat
KANUKOKA-mi siulersuisut aalajangerpaat, suliassaqarfinni sisamani pingaarnerni ataatsimiititaliortoqassasoq, Sulisoqarnermut tunngasuni, Meeqqanut kulturimullu tunngasuni, Suliffeqarnermut Inuussutissarsiuteqarnermullu tunngasuni kiisalu Isumaginninnermut Inuiaqatigiinnullu tunngasuni.
Ulluunerani højskolemut Ilumiumut pilluaqqussut
Ulluunerani højskole Ilumiu Odd Fellow Ordenenimit 119.000 kr.-inik aningaasaliiffigineqarneranut atatillugu Borgmesteri Asii Chemnitz Narupi højskolemut pilersitsisuanullu Esther Hammekenimut pilluaqqusivoq.