Ilinniagaqarnersiutit – Nalinginnaasumik paasissutissiineq

Ilinniagaqarnersiutit tassaapput tapiissutit ilinniartuuguit qinnuteqaatigisinnaasatit. Taakku tapiissutaapput ilinniartuuninni aningaasaqarniarninnut tapertaasussat. Ilinniagaqarnermut tapiissutit makkuusinnaapput:

• aningaasat ikiorsiissutit
• ilinniagaqarnermi akissarsiat
• ilinniarnermut atasumik taarsigassarsiat
• akiliunneqarluni angalanerit
• usinik angallassinerit
• aammalu meeqqanut tapiissutit

Ilinniagaqarnissamut qinnuteqartut tamarmik, ilinniarnertik aallartitsinnagu, ilinniarneq tapiissuteqartarnerlu pillugit piumasaqaataasunut atugassarititaasunullu iluamik paasisaqaqqaarsimanissaat pingaartuuvoq.


Maleruagassat aamma piumasaqaatit
Tunngaviusumik ilinniakkamut ataatsimut qaffasinnerusumulluunniit ilinniarninni ilinniagaqarnersiuteqarsinnaavutit. Tamatuma kingorna ilinniagaqarnersiuteqarnissamut piumasaqaataavoq, ilinniakkap siusinnerusukkut ilinniagarisimasamut pissusissaatut nangitsineruppat suliaqarfiusullu pineqartup iluani qutsinnerusumiittussaappat.

Tunngaviusumik ilinniakkaniit appasinnermik (soorlu ikiortitut ilinniarnerit ukiunik marlunnik sivisussusillit), aappassaaneerluni ilinniagaqarniarnermi ilinniagaqarnersiutit pinissaanut akuersisoqarsinnaavoq.

Ilinniakkanut assigiinngitsunut pingasunut ilinniagaqarnersiutinik pisinnaavutit:

Inuussutissarsiutitigut ilinniartitaanerit

• Inuussutissarsiutinut tunngaviusumik ilinniartitaanerit tassaanerupput ilinniakkat akunnaatsut
• Inuussutissarsiutinut tunngaviusumik ilinniarnerit tamakkerlugu ilinniartutut akissarsiaqassaatit

Ilinnialernissamut piareersarluni ilinniartitaanerit

• Ilinniagaqarnissamut piareersarluni ilinniartitaanerit tassaapput ilinniarnertuunngorniarnerit soorlu GU (gymnasia), HHX (qullasissumik niuernermik ilinniarneq), HTX (qullasissumik teknikkimut tunngasunut soraarummeerneq)
• Ilinniagaqarnissamut piareersarluni ilinniartoq qaffasinnerusumik ilinniartitaanermut piginnaanngorsarneqassaaq
• Ilinniagaqarnissamut piareersarfimmi ilinniarnerit tamakkerlugu aningaasatigut ikiorneqassaatit

Ingerlaqqiffiusumik ilinniartitaanerit

• Qaffasinnerusumik ilinniartitaanerit tassaanerupput teori-mut tunngasunik ilinniarnerit
• Qaffasinnerusumik ilinniarninni aningaasatigut ikiorneqassaatit qiortartakkat atorlugit (ataani nassuiarneqassaaq)

Malugiuk
Ilinniagaqarnissamut piareersarluni ilinniartitaaneq, ukiut kingulliit tallimat ingerlanerini ataasiarnak unitsissimagukku, ilinniagaqarnersiutinik pisinnaanngilatit. Aalajangersagaq qassinik taamaatitsiinnarsimanernut tunngasoq, qaffasinnerusumut ilinniartitaanernut atuutinngilaq, tassani qiortartagaq atorneqarmat.