Inuussutissarsiutitigut ilinniartitaanerit

Inuussutissarsiutitigut ilinniartitaaneq ilinniartitaaneruvoq inuussutissarsiummut aalajangersimasumut sammititaq, soorlu sanasoq, allaffimmioq, saffiooq imaluunniit peqqissaasumut ikiorti. Inuussutissarsiutitigut ilinniartitaaneq naammassigukku, taava suliamik ilinniagalinngorsimassaatit matumalu kingorna sulilersinnaassallutit.

Inuussutissarsiutitigut ilinniartitaanerit ukiut marlunniit tallimat tikillugit sivisussuseqartarput, nikerartumillu atuarfimmi atuartoqartarpoq imaluunniit suliffimmi misiliinerit ingerlanneqartarlutik. Tassa imaappoq, atuagarsornermik ilinniartinneqartassaatit, kingorna suliffimmi piviusunngortinniartassallugit.

Atuarfimmiinnerit sumiiffimmi qitiusumik ilinniarfiusumi sumut ilinniagaqarnermik isumaginnittumi ingerlanneqartarpoq. Assersuutigalugu Sanaartornermik Ilinniarfik Sisimiuniittoq sanaartornerup iluani inuussutissarsiutitigut ilinniartitaanerit isumagisarai. Inuussutissarsiutitigut ilinniartitaanerit ilaat Kalaallit Nunaanniinnaq ingerlanneqartarput, ilinniartitaanerilli ilaasa atuarfimmiissutaasarnerisa ilaa tamakkiisorluunniit Danmark-imi ingerlanneqartarlutik.

Sulilluni misiliiffiusinnaasutut akuerisani sulilluni misiliisoqartarpoq, illit ilinniarninnut naleqquttumik. Assersuutigalugu sanasunngorniaruit, sanasutut suliffeqarfimmi sulillutit misiliinissat nalinginnaasuussaaq.


Tiguneqarnissamut piumasaqaatit
Inuussutissarsiutitigut ilinniakkamik aallartitsisinnaajumaguit, sulilluni misiliiffissannik nassaaqqaarsimasussaavutit.

Tamatuma saniatigut inuussutissarsiutitigut ilinniartitaanerit ilaasa piumasaqaatigisarpaat, meeqqat atuarfiannit soraarummeernermi, atuartitsissutit aalajangersimasut arlallit agguaqatigiisitsinermi aalajangersimasumik illit minnerpaamik angusaqarfigisimassagitit.

Inuussutissarsiutitigut ilinniartitaanernut tiguneqarsinnaanermut piumasaqaatit ilinniarfiit nittartagaanni atuarsinnaavatit sumiiffimmiluunniit qitiusumik ilinniarfinni ilinniartitaanermut siunnersorti attavigisinnaavat.


Malugiuk
Angusat marlussuit amigaatigigukkit imaluunniit meeqqat atuarfiannit anigavit soraarummeernermi angusisimanngikkuit, tamanut Piareersarfiit neqeroorutigisarpaat Inuussutissarsiutinik ilinniagaqalersinnaanissamut piareersarfik akuerisaasoq (AEU).

Sulilluni misiliiffissamik nammineq nassaassaatit. Ikiorneqarumaguit sumiiffinni Piareersarfiit ikiorsinnaavaatsit.

Ilinniakkamut tiguneqarnissat qinnutigigukku, imaanngilaq ilinniartut inaannik ingerlaannartumik isummamineersumik tunineqarnissat naatsorsuutigissagit. Ilinniartut inaannik isummamineersumik tunineqanngikkuit, tamanna immikkut qinnuteqaatigissavat.

Inuussutissarsiutitigut ilinniartitaanerit annertunerusumik paasisaqarfiginiarukkit Ilinniartitaanermut nittartakkami sunngu.gl-imi atuarsinnaavatit.