Piareersarfiit – Nalinginnaasumik paasissutissiineq
Kalaallit Nunaanni kikkut tamarmik ilinniagaqarnissamik sulilernissamillu periarfissaqassapput. Ilinniagaqarnikkut ilisimasanik inuunivit sinnerani atorluarsinnaasassannik pissarsissaatit. Ilinniagaqarsimatillutit suliffissatigut periarfissatit aamma annertunerussapput. Suliffeqaruillu imminut pilersorsinnaallutillu ilaquttatit pilersorsinnaassavatit.
Ilinniagaqalernissamut imaluunniit sulilernissamut piareersarusukkuit najukkanni Piareersarfimmut saaffiginnissinnaavutit. Piareersarfiit aqqutissiuussisarfiullutillu ilinniarfiupput/atuarfiupput illoqarfinni annerni tamani nunaqarfimmilu ataatsimi inissisimasut. Taakkunani aqqutissiuussisartut ikiorsinnaavaatsit paasiniarlugit
- inuttut suliatigullu piginnaasatit
- aammalu sulilernissamut ilinniagaqalernissannullu periarfissatit
Taamatuttaaq Kalaallit Nunaanni aamma Danmark-imi ilinniartitaanerit pillugit aqqutissiuunneqarsinnaavutit.
Iliuusissanut pilersaarut
Aqqutissiuussisartoq iliuusissanut pilersaarusiussaaq, tassanilu sulilernissannut imaluunniit ilinniagaqalernissannut ingerlariaqqiffiusussat nassuiaasersorneqassapput. Assersuutigalugu pineqarsinnaavoq Inuussutissarsiutinik ilinniagaqalersinnaanissamut piareersarfimmi akuerisaasumi (AEU-mi) aallartissasutit, tamatumuunakkut meeqqat atuarfiannit karakteeritit qaffassarsinnaajumallugit.
Qinnuteqaatit
Piareersarfiup ilinniagaqarnissamut, ilinniagaqarnersiutinut aamma kollegiamut qinnuteqaatitit isumagissavai. Taamaattumik qinnuteqaatitit najukkanni Piareersarfimmut tunniullugilluunniit nassiutissavatit.
Malugiuk
Kikkulluunniit aqqutissiuunneqarnissamik periarfissaqarput. Taamaattumik nunaqarfigisanni Piareersarfeqanngippat najukkanni nunaqarfiup allaffianut saaffiginnissinnaavutit, tassanilu innuttaasunik sullissisartut ikiorsinnaassavaatsit.
