Asimi eqqagassalerineq

Asimiinneq nuannersuuvoq. Umiatsiarluta angalaarneq, illuaqqamiinneq, aallaaniarneq, paarnanik nuniagiarneq imaluunniit illoqarfik qimaqqalaarlugu nipaatsumiinneq nuannaraarput, aamma allat sissami qaqqamiluunniit maangaannaq eqqarsimasaat takussallugit takorusunneq ajorpagut.

Qaqqami pisuttuaannaraluaruit imaluunniit piffissami sivisuumi illuaqqamiikkaluaruit, eqqagassaativit, pinngortitamut siaruartinnginnissaat anguniarlugu, peerneqarnissaat akisussaaffigaat.

Taamaammat makku isumagissavatit:

• Illuaqqavit eqqaata saligaatsuunissaa kusanartuunissaalu,
• Pinngortitamut maangaannaq ilisisoqaranilu eqqaasoqannginnissaa aammalu
• Angerlaleruit eqqagassaativit nassarnissaat eqqaamassallugu.
   

Eqqakkat asiusinnaasut, soorlu neqinit aalisakkanillu sinnikut, naatitat qalipaat, naatitat naasullu, kaffit sinnikui, tii puukui assigisaallu ikuallanneqarsinnaapput, nunamut assaanneqarlutik sumiiffimmiluunniit naggorissaatissanngorlugit inissinneqarlutik, peqqissutsimut isumannaallisaanermullu tunngatillugu illersorneqarsinnaappat teqqaasoortoqarsinnaanngippallu imaluunniit sumiiffinnik qanigisaaniittunik kingornatigut mingutsitsisoqarsinnaanngippat.


Eqqagassat avatangiisinut ulorianaatillit, savimerngit saffiugassallu kiisalu igalaamerngit puiaasallu angerlaanneqartussaapput.