Nersornaammut najoqqutassat

Siunertaa inuillu pineqartut
Nersornaatip siunertaraa inuit ataasiakkaat eqimattalluunniit Kommuneqarfik Sermersuumi illoqarfeqatiminnut immikkut ittumik nukittorsaataasumik suliniuteqarsimasut nersorniarnissaat iluarisaanerisalu takutinniarnissaa. Nersornaasiinermi naleqartitatut tunngavigineqartut inuiaqatigiinnut pitsaasuullutillu saqqumilaartuussapput. Suliniuteqartumut eqeersimaartumut nersornaat inuussutissarsiornerup, kulturip isumaginninnerullu iluaniissaaq. Suliniuteqartumut eqeersimaartumut nersornaat Kommuneqarfik Sermersuumi innuttaasunut tunniunneqartassaaq.

Aningaasaqarnermut ataatsimiititamut kommunalbestyrelsimullu inassuteqarneq
Kommuneqarfik Sermersuumi innuttaasut tamarmik suliniuteqartumut eqeersimaartumut nersornaammut innersuussisinnaapput. Allaffissornikkut suliassat suliaqarfiit akimorlugit suleqatigiinnit Kommuneqarfik Sermersuumi ingerlatsivinnit tamanit sinniisuutitaqarfigineqartumit isumagineqassapput. Borgmesterip allattoqarfianeersoq suleqatigiinni akisussaasuussaaq. Suleqatigiit suliassaasa pingaarnersaraat innuttaasut innersuussutaat tunngavigalugit siunnersuusiornissaq aningaasaqarnermullu ataatsimiititamut kommunalbestyrelsimullu inassuteqartarnissaq.

Allaffissornikkut suleqatigiit inassuteqaatit ingerlateqqinnissaannut tunngavissat nammineerlutik suliarissavaat, Kommuneqarfik Sermersuumili najugaqarfiit assigiinngitsut akornanni agguaassisarnerup piffissap ingerlanerani allanngorartuunissaa pingaartinneqarpoq. Aningaasaqarnermut ataatsimiititap pilersaarutaasumik ataatsimiinnissaa sapaatit akunnerinik arfinilinnik sioqqullugu suliniuteqartumut eqeersimaartumut nersornaasigassatut innersuussinissamut najoqqutassat piffissaliussallu tusagassiuutini attuumassuteqartuni saqqummiunneqassapput innersuussinerillu allaffissornikkut suleqatigiit aningaasaqarnermut ataatsimiititap pilersaarutaasumik ataatsimiinnissaa sapaatit akunnerinik marlunnik sioqqullugu tigoreersimassavaat. Nersornaammik tunniussineq ukioriartornerani pisassaaq, kommunalbestyrelsip ataatsimiinnerata kingorna tunniunneqartassalluni. 2011-imut nersornaasiinissamut pilersaarutaavoq innersuussinissamut piffissaliussaq tassaassasoq oktoberip 15.-iat. Taamaasilluni aningaasaqarnermut ataatsimiititaliami novembarip aallaqqaataani aalajagiiffigineqassaaq kingornalu kommunalbestyrelsemi novembarip 22-iani inaarutaasumik aalajagiiffigineqassalluni. Taamaasilluni nersornaasiineq decembarimi pissaaq.

Nersornaat
Suliniuteqartumut eqeersimaartumut nersornaat uppernarsaatitaqarpoq, tunissut annikinnerusoq aningaasanillu tunissut 15.000 kr.-inik aningaasartaqartoq, aningaasat tunniunneqartut akileraarutinik ilanngaatereerlugit 15.000 kr.-iusut tunniunneqartassapput. Nersornaaserneqartut ukiumut pingasuusinnaapput. Kommuneqarfik Sermersooq pisussaavoq aningaasatigut nersorsaatitut tunissutinik Akileraartarnermut aqutsisoqarfimmut nalunaaruteqassalluni, susassaqarfimmi inatsisit atuuttut malillugit.

Suliniuteqartumut eqeersimaartumut nersornaammut atugassamik innersuussinissamut immersugassamik suliaqartoqarsimavoq.

Innersuussummut immersukkat kommuneqarfik@sermersooq.gl atorlugu nassiuguk, imaluunniit sumiiffinni innuttaasunut sullivimmut / kommunip allaffianut tunniuguk