Meeqqanut akilersuutit

Angajoqqaat meeqqaminnut pilersuisussaatitaapput. Angajoqqaat najugaqatigiikkaangata, naatsorsuutigineqartarpoq meeqqaminnut pilersuinermut marluullutik peqataasarnerat. Angajoqqaat najugaqatigiinngikkaangata, angajoqqaajusup aappaa meeqqamik imminiisitsisoq, angajoqqaap aappaaniit aningaasatigut ikiorserneqarsinnaavoq.

Meeqqanut akilersuutit tassaapput aningaasat, angajoqqaap aappaata (akilersuisussaatitaasup) angajoqqaamut meeqqamik imminiisitsisumut (akilersuiffigineqartussaq) akiligassatut pisussaaffeqassutigilersinnaasai. Aallaavittut isigalugu angajoqqaat namminneerlutik aningaasat amerlassusissaat qaqugulu taakku akilerneqarnissaat isumaqatigiissutigisussaavaat. Isumaqatigiissinnaanngikkunik, aningaasat amerlassusissaat qaqugulu akilerneqartarnissaat eqqartuussiviup aalajangersassavaa.

Akilersuiffigineqartussap akilersuisussaasumiit akiligassaasut tigusimanngippagit, akilersuiffigineqartussap qinnuteqaatigisinnaavaa, kommunip akilersuutit tunniutissagai. Tamatuma malitsigisaanik, inuk akiliuteqartussaq akiliinngippat, taava kommunip akilersuiffigitittussamut aningaasat siumoortumik tunniussinnaavai. Tamatuma kingorna akilersuisussaatitaasumiit aningaasat kommunip akileqqussavai.

Akilersuutit siumoortumik pisortaniit tunniunneqarsinnaasut tassaapput:

• Nalinginaasumik meeqqanut akilersuutit (A-bidrag), piffissami maannakkut qaammammut 1.000 kr.-iusut
• Anaanaasup pilersorneranut akilersuutit, erninissaq qaammatinik marlunnik sioqqullugu aamma ernereernermi qaammat ataaseq
• Meeqqap inunngorneranut atatillugu aningaasartuutinut akilersuutit
• Meeqqap kuisinneranut akilersuutit
• Meeqqap apersortinneranut imaluunniit pisumut assingusumut atatillugu akilersuutit

Akilersuutit ulloq akiliiffissap kingorna ullormi tulliuttumi tunniunneqartarput. Ulloq akiliiffissaq tassaavoq meeqqap inuuissiorfia aamma tamatuma kingorna ukiup affaata qaangiunnera.


Akilersuutit pisortanit tapiissutitut
Kisimiillutit pilersuisuuguit ataatassarsiuinerlu suli aalajangiiffigineqarsimanngippat imaluunniit pilersuisussaatitaasoq toqukkut qimagussimappat, siuliini taaneqartut akilersuutit pisortaniit tapiissutitut pissarsiarisinnaavatit.

Taama pisoqartillugu akilersuutit meeqqap inuuia ulloq ullormik ataatsimik sioqqutsisumik tamatumalu kingorna ukiup affaata qaangiunneri tamaasa tunniunneqartarput.


Meeravissiartaarnermi tapiissutit
Angajoqqaarsiaagussi meeravissiartaarsimallusilu, meeravissiartaarneq sioqqullugu ilissinniissimanngitsumik, meeravissiartaarnermi tapiissutinik pissarsisinnaavusi. Taamaattoq taamaallaat meeravissiartaarnermi tapiissutinik pissarsisinnaavusi imaattoqarpat

• suliniaqatigiiffik akuerisaasoq aqqutigalugu meeravissiartaarnissaq ingerlanneqarsimappat
• aamma meeqqap aaneranut atatillugu angalanermut aningaasartuuteqarsimagussi