Pisortanit ikiorsiissutit – Naammagittaalliorneq
Inersimasut tamakkerlutik sapinngisaq tamaat atorlugu imminnut ilaquttaminnullu pilersuinissamut pisussaaffeqarput. Tamanna piffissap ilaani imaluunniit sivisunerusumik pisinnaanngippat, innuttaasutut pisortat ikiorsiissutaannik pisartagaqalernissamik qinnuteqaateqarsinnaavutit. Tamanna assersuutigalugu, toqusoqarneranut, napparsimasoqarneranut, suliffissaaleqisoqarneranut, erninermut atatillugu sulinngiffeqartoqarneranut avinnermulluunniit tunngasuusinnaavoq. Pisortat ikiorsiissutaat taamaalilluni inunnut tamanut Kalaallit Nunaannittunut aningaasaqarnikkut sillimmasiissutaavoq.
Pisortat ikiorsiissutaannik pisartagaqarlernissamik qinnuteqarnikuuguit qinnuteqaatigisannullu tamakkiisumik taperserneqarnak, kommune tunngavilersuuteqarnissaminut aamma naammagittaalliorsinnaanermut ilitsersuinissaminut pisussaaffeqarpoq. Aalajangiinerit naammagittaalliutigisinnaasatit assersuutigalugu makkuusinnaapput:
- Pilersuisussaanermut aamma aalajangersimasumik aningaasartuutinut pisortat ikiorsiissutaannik pissarsinissamut itigartitsineq
- Pinngitsaalisaasumik aningaasaqarnikkut aqutsivigineqarneq
- Tassanngaannartumik ikiorsiissutinik pissarsinissamut itigartitaaneq
- Pisortat ikiorsiissutaannik utertillugit akiliisussanngortitaaneq
Kommunimi aalajangiinerup allaganngukkap naammagittaalliutigiumasavit tiguneraniit sivikinnerpaamik sapaatit akunneri sisamat qaangiunneranni, naammagittaalliutigisat Inunnik Isumaginninneq pillugu Naammagittaalliuteqartarfimmut nassiutissavat. Naammagittaalliuteqarluni immersugassaq naammagittaalliuteqarninnut atatillugu immersussavat.
Kommune aalajangiippat illit taperserneqanngitsutit, taava kommune pisussaavoq naammagittaalliornissami immersugassaq ilinnut tunniutissallugu. Naammagittaalliorluni immersuiffissaq kommunimit pissarsiarisimanngikkukku, nittartagaq una atorlugu aasinnaavat.
Naammagittaalliutit uunga nassiutissavat:
Inunnik Isumaginninneq pillugu Naammagittaalliuteqartarfik
Postboks 689
3900 Nuuk
Naammagittaalliutit aamma qarasaasiakkut nassiussinnaavat uunga: dsa@nanoq.gl
Malugiuk
Eqqaamassavat ilanngutissagakkit
- aalajangiineq allaganngugaq, naammagittaalliutigiumasat
- pisoq sioqqullugu kommunimik allaffigeqatigiissutaasimasinnaasut
- sooq aalajangiineq eqqortuunngitsoq pillugu illit tunngavilersuutit
Naammagittaalliutit sukkasuumik sapinngisamillu ajornaannerpaamik naammagittaalliortarfimmit suliarineqarnissaanut paasissutissat taakku pingaaruteqarput.
Naammagittaalliutit nammineerlutit allassinnaanngikkukku, kommunip ikiorsinnaavaatit.
