Utoqqalineq pissutigalugu pensionisiat

65-inik ukioqaleruit, utoqqalineq pissutigalugu pensionisiassanik pisartagaqalernissamut pisinnaatitaalissaatit.


Piumasaqaatit
Utoqqalineq pissutigalugu pensionisiassanik pisartagaqalerniaruit:

• Dansk-isut innuttaassuseqassaatit
• Kalaallit Nunaanni aalajangersimasumik najugaqassaatit
• 65-inik ukioqalersimassaatit

Dansk-isut innuttaassuseqanngikkuit, pensionisiassanik pissarsisalernissamut pisut ilaanni periarfissaqarpoq. Paasissutissat annertunerusut pissarsiariumagukkit najukkanni innuttaasunik sullissivimmut imaluunniit nunaqarfiup allaffianut saaffiginnissinnaavutit.


Pensionisiassat annertussusaat
Tunngaviusumik aningaasat annertussusaat kisimiittumut allanik isertitaqanngitsumut, akileraarutit akilereernagit qaammammut 10.291 kr.-iuvoq.

Tunngaviusumik aningaasat annertussusaat katissimasunut allanik isertitaqanngitsunut, akileraarutit akilereernagit qaammammut 14.034 kr.-iuvoq.

Utoqqaat angerlarsimaffiini aamma ulloq unnuarlu paaqqinniffinni najugaqartunut kaasarfimmiut, akileraarutit peereernagit aningaasat qaammammut aalajangersimasut tunniunneqartarput. Najukkanni innuttaasunik sullissivimmut imaluunniit nunaqarfiup allaffianut saaffiginninnikkut aningaasat annertussusaat paasiniarsinnaavat. Piffissami matumani qaammammut aningaasat annertussusaat 2.058 kr.-iuvoq.

Isertitaqarninnut tunngasut ukiup ingerlanerani pingaarutilimmik ataavartussamillu allannguuteqarpata, pensionit pisartakkatit assinganik allanngorsinnaapput, allannguutillu pinerata kingorna qaammat qaangiutiinnartoq atuutilissaaq.


Utoqqaat angerlarsimaffiat
Utoqqaat angerlarsimaffiannut imaluunniit ulloq unnuarlu paaqqinniffimmut nuussaguit, qaammammi nuuffiusumi qaammammilu tullermi pensionisiat ilinnut tunniunneqartartut allannguuteqarnatik tunniunneqassapput. Matuma kingorna allap isertitai apeqqutaatinnagit kaasarfimmiussat tigusalissavatit.

Katissimasat imaluunniit inooqatigisat utoqqaat angerlarsimaffiannut imaluunniit ulloq unnuarlu inunnik allatut isumaginniffimmut nuuppat, illillu inigisassinniiginnarlutit, kisimiittutut isigineqalissaatit. Tamatuma kinguneranik pensionisiat aningaasartaat kisimiittumut naatsorsuunneqartut naleqqataat pissarsiarisalissavatit.

Utoqqaat angerlarsimaffianni imaluunniit ulloq unnuarlu inunnik allatut isumaginniffimmi najugaqaruit aamma saniatigut isertitaqaruit, assersuutigalugu tjenestemand-itut pensionisiaqarlutit, annerpaamik isertitavit 60 %-iinik najugaqarninnut akiliuteqartussaavutit.


Malugiuk
Utoqqalineq pissutigalugu pensionisiaqalernissat qinnuteqaatiginiarukku, qinnuteqaatit najukkanni innuttaasunik sullissivimmut imaluunniit nunaqarfiup allaffianut nassiulluguluunniit tunniutissavat.

Piffissaagallartillugu pensionisiaqalernissamik qinnuteqarnissat eqqaamagiuk.

Nappaateqarneq pissutigalugu pensionisiatit nammineq aqussinnaanngikkukkit, aningaasaqarnikkut nakkutilliisumik pisinnaavutit, taassuma pensionisiatit sinnerlutit isumagisinnaavai.