Sanaqateqarluni illuliorneq – Nalinginnaasumik paasissutissiineq

Nunaqarfinni avinngarusimanerusunilu nammineerluni illuliornermik aaqqissuussineq nutaanngitsoq 2008-mi januar-ip aallaqqaataani atorunnaarpoq. Taarsiullugu sanaqateqarluni illuliortarnermik aaqqissuussineq Inatsisartut akuersissutigaat, tassani ilaatinneqarput sanariaatsit aamma aningaasalersueriaatsit nutaat. Sanaqateqarluni illuliat pillugit aaqqissuussineq INI-mit aqunneqarpoq, taamatullu aaqqissuussinermik suliassat nalinginnaasut amerlanersaat INI-mit isumagineqartarlutik.

Taarsigassarsiat annertussusaat
Sanaqateqarluni illuliorneq aaqqissuussineq aqqutigalugu illit nammineq illuit sananissaanut taarsigassarsiat erniaqanngitsut taarsersugassaanngitsullu qinnuteqaatigisinnaavatit. Qanoq annertutigisunik taarsigassarsisinnaanissinnut inoqutigiiususi ukiuni kingullerni tallimani isertitasi aallaaviussapput. Inoqutigiittut isertitatit amerliartuaartillugit nammineq akiliutissat alliartuaartarput.

• Inoqutigiiususi ukiuni kingullerni tallimani agguaqatigiisillugu isertitasi 0 aamma 180.000 kr.-t akornanniippata, sanaartornermi atortussanut aningaasartuutit tamarmiusut 5 %-ii nammineerlutit akiliutigissavatit – sinneruttut 95 %-it taarsigassarsiatut erniaqanngitsutut taarsersugassaanngitsutullu pisinnaavatit, annerpaamilli 302.000 kr.-t
• Isertitanut ukiumut qummut killiliussaq 450.000 kr.-uvoq. Inoqutigiit ukiuni kingullerni tallimani isertitaasa agguaqatigiisillugu 450.000 kr.-t sinnersimappatigit, sanaqateqarluni illuliassanut erniaqanngitsunik taarsersugassaanngitsunillu taarsigassarsinnaanngilatit
  
  

Sananermi aningaasartuutit tamarmiusut
Sananermi aningaasartuutit tamarmiusut tassaapput:

• Atortussat ilitsersorneqarnermullu aningaasartuutit. Illorput type 1, 2, 3 aamma 4-p sananerani atortussanut aamma ilitsersorneqarnermut aningaasartuutit aalajangersimasuupput
• Neqeroorut, illup toqqavissaata sananeqarneranut aningaasartuutissanik imalik (sanasup imaluunniit suliffeqarfiup suliarinnittussap neqeroorutaa)
• Neqeroorut, illup napparneranut inaarsarneranullu aningaasartuutissanik imalik (sanasup imaluunniit suliffeqarfiup suliarinnittussap neqeroorutaa)
• Neqeroorut, imermut, kiassarnermut aamma illumi kuuffinnut atortulersuutinik ikkussuinermi aningaasartuutissanik imalik (ruujorilerisup imaluunniit suliffeqarfiup suliarinnittussap neqeroorutaa)
• Neqeroorut, innaallagissamoortunik atortulersuinermut aningaasartuutissanik imalik (innaallagisserisumiit imaluunniit suliffeqarfiup suliarinnittussap neqeroorutaa)
  
  

Sanaqateqarluni illuliorninni ikiortigisannut aningaasartuutinut amerlanerpaamik 302.000 kr.-t tikillugit tapiissutinik pisinnaavutit. Taakku saniatigut aningaasartuuteqassaguit illit nammineq akilissavatit.


Malugiuk
Aaqqissuussineq aningaasanut inatsimmik aallaaveqartarpoq. Tassa imaappoq, sanaqateqarluni illuliornissamut taamaallaat taarsigassarsisinnaavutit aningaasanut inatsimmi aningaasanik siunertamut tassunga immikkoortitsisoqarsimappat.