Taarsigassarsiat sinneruttut tamaasa ataatsikkut akilerneri

Inissialiornermut tapiissuteqartarneq aqqutigalugu illuut tassaavoq, illu inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq inissialiornermut tapiissuteqartarnermik aaqqissuussineq malillugu Nunatta karsianiit aningaasanik illumik piginnittoq illup sananissaanut taarsigassarsisimassaaq. Taamaattumik taarsigassarsiat utertillugit akilernissaasa tungaannut Namminersorlutik Oqartussanut arlalinnik pisussaaffeqartoqartarpoq. Namminersorlutik Oqartussat sinnerlugit inissialiornermut tapiissuteqartarnermik aaqqissuussineq INI-mit aqunneqarpoq. Tamatuma kingunerisaanik inissialiornermut tapiissuteqartarneq aqqutigalugu illuutilittut INI attaveqarfigisartussaavat.

Inissialiornermut tapiissuteqartarneq aqqutigalugu illuuteqaruit imaluunniit nammineq illuliamik peqaruit, taarsigassarsiarisatit sinneruttut tamakkerlugit ataatsikkut akilersinnaavatit.

Taarsigassarsiat erniallit atorlugit inissialiornermut tapiissuteqartarneq aqqutigalugu illumik peqaruit, taarsigassarsiat sinneruttut tamakkerlugit ataatsikkut akiliiguit 30 %-imik akikillisaavigineqassaatit. Kinguaattooruteqaruilli taakkununnga akikillisaavigineqarsinnaanngilatit.

Nammineerluni illuliamik allamilluunniit illumik peqaruit, tapiiffigineqarsimanngitsumik, akikillisaavigineqarsinnaanngilatit.

Taarsigassarsiavit sinneri ataatsikkut tamaasa akilerniarukkit, najukkanni INI-p allaffeqarfianut saaffiginnissaatit. Ullormi tassani utertitsilluni akiliuteqarfiusumi  akiliutissannut naatsorsuusiamik tunineqassaatit. Illit aningaaseriviit sinnerlutit INI-mut aamma saaffiginnissinnaavoq.

Taarsigassarsiatit utertillugit akilereerukkit, illup qularnaveeqqutaa pillugu allagaq INI-p  eqqartuussivimmi illut piginnittuinik nalunaarsuisarfianut atorunnaarsinneqartussanngorlugu nassiutissavaa. Ilutigisaanik inissialiornermut tapiissuteqartarnermi maleruagassanut maanna pituttoqqajunnaarnerit pillugu INI uppernarsaammik ilinnut nassiussissaaq.