AMA-mi pikkorissarneq
Inuussutissarsiutit ilaat piorsaaffiullutillu annertusaaffiusut allat ingerlariaqqiffiunatillu appariartorfiupput. Suliffeqarneq allanngoriartorfiujuartoq naleqqussaaffigiumallugu pisariaqarsinnaasarpoq ilinniagaqaqqittoqartarnissaa. AMA – sulisoqarnermut akitsuut aqqutigalugu aaqqissuussineq ilinnut neqerooruteqarfiuvoq ilinniagaqaqqikkumaguit.
AMA tapiissuteqartarnermik aaqqissuussineruvoq suliffeqarnermut akitsuut aqqutigalugu aningaasalersorneqartoq. AMA aqqutigalugu inuussutissarsiutinut pikkorissartitsisarnernut ilinniagaqaqqinnissamullu pikkorissartitsisarnernut tapiissuteqartoqartarpoq.
Aaqqissuussineq pineqartoq aqqutigalugu illit sulisitsisut imaluunniit kommune, inuussutissarsiutinut ilinniartitaanernik pikkorissartitsinernut atatillugu, angalanissanut najugaqartitsinissanullu aningaasartuutissanut aningaasaliissutinik qinnuteqarsinnaapput. Imaappoq suliffeqarnermi pisinnaasassat piginnaasassallu noqqaassutigineqartut ingerlaavartumik pissarsiarisarsinnaavatit.
Siunnerfiusut tassaapput suliamik ilinniagaqarsimanngitsut, suliamik ilinniagaqarsimasut, inuit suliffillit aamma suliffissaaleqisut.
AMA-mi pikkorissartitsisarnerit Qitiusumik Ilinniarfinnit neqeroorutigineqartarlutillu taakkunani ingerlanneqartarput. Sivikinnerpaamik ullunik sisamanik sivisussuseqartarpoq pikkorissartitsineq nalinginnaasumillu sapaatip akunneranik ataatsimik sapaatillu akunnerinik sisamanik sivusussuseqartarlutik. AMA-mi ilaatigut makku iluanni pikkorissartitsinernik neqerooruteqartoqartarpoq:
- Sanaartorneq
- Aatsitassarsiorneq
- Saviminilerineq
- Niuertarfiit
- Takornariaqarneq
- Aalisakkanik suliffissuit
- Oqaatsit
- Nerisassat aamma akunnittarfiit/neriniartarfiit
- Isumaginninneq
- Peqqinnissaq
AMA-mi pikkorissarnerit misilitsinnermik naggaserneqarajuttarput. AMA-mi pikkorissarnerit naammassereerukku pikkorissarsimaninnik uppernarsaat pissarsiarissavat, taannalu assersuutigalugu atorsinnaassavat nutaamik suliffissarsiorninni.
Malugiuk
AMA-mi pikkorissartitsinerit pinngitsoorani takkuttussaatitaaffiupput.
