Nuttarnerulersitsiniarluni tapiissutit
Pissutsit tamarmik ajunngikkaluarpata Nunatsinni kikkut tamarmik sulinermikkut imminnut pilersorsinnaasussaagaluarput. Suliffissarsiumalluni pisariaqarsinnaasarpoq nuuffigissallugit suliffissanik periarfissaqarfiusut. Nuunnissamullu atasumik aningaasartuutit amerlasinnaaqaat. Suliffissamut atatillugu aningaasartuutissat ilaat matussuserneqarsinnaajumallugit nuttarnerulersitsiniarluni tapiissutinik qinnuteqarsinnaavutit.
Nuttarnerulersitsiniarluni tapiissutit aningaasatigut tapiissutaapput pissarsiaqarfigisinnaasatit Nunatsinni illoqarfimmi allami ataavartumik nutaamik atorfittaareeruit, taamatullu nuuttariaqalerlutit. Aningaasatigut tapiissutit assersuutigalugu ukununnga atorneqarsinnaapput:
- Bilitsit akilerneqarnissaannut
- Pequtit nuunnissaat tamakkiisumik
- Akunnikkallarnissamut aningaasartuutit
- Pequtit sillimmaserneqarnissaannut
Nuttarnerulersitsiniarluni tapiissutinik aatsaat pissarsisinnaavutit nuunnissamut aningaasartuutit sullivigilikkannit matussusertissinnaanngikkukkit.
Nuttarnerulersitsiniarluni tapiissutit ilaquttannut aamma atuutissapput, assersuutigalugu:
- Inooqatigisannut (sivikinnerpaamik ukiumi ataatsimi najugaqatigeereersimassaasi)
- Aapparisannut (uinnut/nuliannut)
- Qitornanut 18-it inorlugit ukiulinnut
Akit
Nutsigassat (pequttat) qanoq initutigisinnaanerat sillimmasiissutaasussallu annertussusissaat tapiissutisiaqarfigisinnaasatit pillugit aalajangersimasunik maleruagassaqarpoq. Akit qanoq annertutigisinnaanerannut apeqqutaassaaq inoqutigiinni qassiunersusi:
- Kisimiittut nutsigassanut 15 m3-inut tapiissutisisinnaapput sillimmaserneqarsinnaasussanik 182.500 kr.-nit tikillugit nalinginut
- Aappariit katissimasut nutsigassanut 30 m3-inut tapiissutisisinnaapput sillimmaserneqarsinnaasussanik 364.800 kr.-nit nalinginut
- Qitornamut ataatsimut nutsigassanut 5 m3-inut tapiissutisisoqarsinnaavoq sillimmaserneqarsinnaasussanik 60.800 kr.-nit nalinginut
Malugiuk
Pequtitit sillimmaserneqarsinnaassappata nutsernissaat pequtinik nutserisartoqarfimmit akuerisaasumit isumagineqassapput. Nalornissutigigukku pequtinik nutserisartoqarfiit illit illoqarfinni sorliit akuerisaasuunersut Royal Arctic Line attavigisinnaavat
