Piginnaanngorsaaqqinneq/Revalidering

Pissutsit tamarmik ajunngikkaluarpata Nunatsinni kikkut tamarmik sulinermikkut imminnut pilersorsinnaasussaagaluarput. Taamaattorli kikkut tamarmik suliffimmik isumagisaqarsinnaallutillu suliffissarsisinnaaneq ajorput. Piginnaanngorsaaqqinneq/revalidering inunnut inuussutissarsiorsinnaalereerlutik utoqqaassusilinnut sulisinnaassusertillu apparsimanera pissutigalugu suliffimmik isumaginninnissamut imaluunniit suliffissarsinissamut ajornakusoortitsisunut neqeroorutaavoq. Piginnaanngorsaaqqinnikkut suliffigisamiiginnarsinnaanissamut imaluunniit nutaamik nassaarsinnaanissamut periarfissat pitsaanerulersarput.

Piginnaanngorsaaqqinneq tassaagajussinnaavoq:

Sulilluni misiliineq, periarfissinneqassallutit piffissami sivikitsumi sulineq ataaseq amerlanerusulluunniit misilissallugit. Taamaasillutit paasisaqarfigissavat sulineq suna isumagisinnaanerlugu. Ilutigalugu aamma paasisaqarfigisinnaassavat suliffissatut kissaatigisap isumagisinnaanissaanut piginnaanngorsaaqqinnermik allamik neqeroorfigineqaqqaartariaqassanersutit.

Suliffeqarfimmi piginnaanngorsaaqqinneq, sungiusarnerusinnaasoq ilinniagaqarnerusinnaasorluunniit suliffeqarfimmi ingerlanneqartussatut. Suliffeqarfimmi sulitillutit aningaasarsiaqassaatit. Suliffeqarfimmi piginnaanngorsaaqqittoqarnissaanut piumasaqaataavoq illit, kommunimi sulianik suliarinnittorisartakkappit aammalu sulisitsisup akunnissinni isumaqatigiissusiortoqarnissaa sulisitsisumi pineqartumi sulisinnaanissat pillugu.

Illiniagaqarneq, suliatigut eqqaamasanik nutarteriffiusinnaasoq imaluunniit nutaamik ilinniagaqarfiusinnaasoq. Ilinniagaqareersimaguit piffissamili sivisuumi atorsimanagu, pisariaqarsinnaasarpoq suliatigut eqqaamasanik nutartereqqiffiusumik ingerlataqarnissaq. Ilinniagaqarsimanngikkuilli nutaamik ilinniagaqalernissat siunnerfigisinnaavat.

Allamut ilinniarneq, aqqutissaasinnaasoq maannamut suliarisartakkannik allaanerusunik ilinniarfigisassatut. Tamanna pisariaqarsinnaasarpoq assersuutigalugu ajoqusersimaneq pissutigalugu siusinnerusukkut suliarisariikkatit isumagisinnaajunnaarukkit. Allamut ilinniarneq pisinnaavoq ilinniagaqarnikkut imaluunniit piginnaasaqarfigilikkanik pikkorissartarnikkut.

Sungiusarneq, tangiartuisartumi imaluunniit pillarissaasumi timimik sungiusaqqinnerusoq. Sungiusaqqinnissaq assersuutigalugu pisariaqarsinnaasarpoq sulitillutit ajoqusersimaguit, taamaatullu suliatit isumagisinnaajunnaarsimallugit.

Eqaannerusumik suliffeqarneq, immikkut malitassaqarluni sulinerussasoq. Assersuutigalugu tassaasinnaavoq piffissap ilaannaani sulisarneq imaluunniit immikkut qajassuussiviusumik suliaqartarneq. Malitassat nalinginnaasut naapertorlugit sulisinnaanngikkuit aammalu piginnaanngorsaaqqinnikkut neqeroorutit allat iluaqutaasimanngippata periarfissaqarputit eqaannerusumik suliffeqarnissamik. Kommunip eqaannerusumik suliffissannik neqeroorfigereerpatit aningaasarsiassat sulinermilu atugarisassat allat, ilanngullugu piffissaq sulifiusussaq, aalajangersarneqassapput atorfeqarfiusumut isumaqatigiissut atuuttoq naapertorlugu.

Malugiuk

Piginnaanngorsaaqqinnermut allanik aamma neqerooruteqartoqarsinnaasarpoq, assersuutigalugit:

• Inuttut ineriartoqqinneq
• Pinngitsuuisinnaanermik katsorsartinneq
• Sulilersinneqarneq

Nalinginnaasumik malitassat naapertorlugit suliffissarsinissamut piginnaanngorsaaqqinnikkut periarfissat nunguppata kommunip pineqartoq inassutigisinnaavaa siusinaartumik soraarnerussutisiaqalissasoq.