Suliffeqanngikkallarnermi ikiorsiissutit
Pissutsit tamarmik ajunngikkaluarpata Nunatsinni kikkut tamarmik sulinermikkut imminnut pilersorsinnaasussaagaluarput. Taamaattorli kikkut tamarmik suliffissarsisinnaanngillat. Suliffissaaleqitillunilu aningaasaqarnikkut nalorninartumik inissisimasoqartarpoq, suliffeqarneq aqqutigalugu isertitassat isumannaarneqarsinnaasanngimmata. Taamaattumik piffissami suliffissaaleqinermi pisortanit aningaasatigut ikiorserneqarnissaq pisariaqartinneqarsinnaasarpoq.
Suliffeqanngikkallarnermi ikiorsiissutit pisortanit aningaasatigut ikiorsiissutitut aaqqissuussaapput, taakkuninngalu pissarsisinnaavutit
- nammineq pisuussutiginngisannik suliffissaaleqisuutillutit
- (suliassaarunnermi) angerlartiinnarneqarsimanermi
- aammalu piffinni napparsimaffiusuni
Suliffeqanngikkallarnermi ikiorsiissutinik pisartagaqarnissamut piumasaqaataavoq
- 18-inik ukioqalereersimanissat imaluunniit pilersuisuussasutit
- Nunatsinni inuit allattorsimaffianni nalunaarsorsimassasutit
- suliffeqarnermut attuumassuteqassasutit. Imaappoq, sulinermik inuussutissarsiuteqartutut sapaatit akunnerini kingullerni 13-ini nalunaaquttap akunnerini 182-ini suliffissaqartinneqarsimassasutit.
Suliffeqanngikkallarnermi ikiorsiissutit annertussusissaat naatsorsorneqartarput sapaatit akunnerini kingullerni nalunaaquttap akunnerini qassini sulisimanerit naapertorlugu. Tiimit amerlanerit sulisimaguit akitigut qaffasissuseq qaffasinnerulissaaq. Taamaakkaluartoq suliffeqanngikkallarnermi ikiorsiissutinik sivisunerpaamik nalunaaquttap akunnerini 520-ni suliffissaqartinneqarsimanerup nalinginik pissarsisinnaavutit.
Suliffeqanngikkallarnermi ikiorsiissutinik pisartagaqalersinnaavutit piffiup suliffissaaleqilerfigisavit aallartinneraniit ullormit siullermit, katillugit sapaatit akunnerini 13-ini.
Suliffeqanngikkallarnermi ikiorsiissutit akiliutigineqartarput ullut 14-ikkaarlugit kingumoortumik.
Malugiuk
Suliffeqanngikkallarnermi ikiorsiisutisiarisartakkannit akileraartartussaagavit, soorluttaaq nammineq (akileraarutinut) immersukkanni ilisimatitsissutigissagit suliffeqanngikkallarnermi ikiorsiissutinik pisartagaqarlutit. Sulinngiffeqarnersiutinik katersisinnaanngilatit suliffeqanngikkallarnermi ikiorsiissutitut pisartakkannit.
Suliffeqanngikkallarnermi ikiorsiissutit annertussusinissaannut apeqqutaasutuaq tassaavoq sapaatit akunneri kingullerni 13-ini nalunaaquttat akunnerini qassini illit sulisimanersutit. Taamaattumik suliffeqanngikkallarnermi ikiorsiissutinik pisartagaqarsinnaatitaaneq annaanavianngilat uiit/nuliat imaluunniit inooqatigisat isertitaqartaraluarpalluunniit.
