Suliffissaaleqineq

Pissutsit tamarmik ajunngikkaluarpata Nunatsinni kikkut tamarmik sulinermikkut imminnut pilersorsinnaasussaagaluarput. Taamaattorli kikkut tamarmik suliffissarsisinnaanngillat. Tamatumunnga pissutaasut assigiinngitsorpassuusinnaapput. Assersuutigalugu pissutaasinnaavoq:

• Ilinnigaqaqqammerneq
• Soraarsitaasimaneq
• Sulitilluni ajoqusersimaneq pissutigalugu piffissami tamakkiisumik sulisinnaajunnaarsimaneq
• Nammineq soraarniuteqarsimaneq
• Ukiup qanoq ilinera malillugu sulisartuuneq
• Akunnattoorfimmi suliffissaaleqilerneq, assersuutigalugu tunisassiassaarunneq imaluunniit tunisassiornermik unitsitsineq pissutigalugit.

Pisinnaatitaaffiit aamma pisussaaffiit

Suliffissaaleqilersimaguit najukkanni suliffissarsiuussisarfimmut saaffiginnissaatit. Tassani nalunaarsorneqassaatit suliffissaaleqisutut. Taamatut nalunaarsorneqareeruit pisinnaatitaaffiit pisussaaffiillu arlallit malitsigineqassapput. Suliffissaaleqisutut assersuutigalugu pisinnaatitaaffigissavatit:

• Ilinnut iliuusissat pillugit pilersaarusiortoqarnissaa. Iliuusissat pillugit pilersaarummi nassuiaasiarineqartarpoq qanoq iliorsinnaanersutit nutaamik suliffittaarnissannut periarfissatit pitsaanerulersikkumallugit. Assersuutigalugu tassaasinnaavoq sulifimmut nutaamut innersuunneqartutit, sulilersinneqartutit, piginnaanngorsaaqqinnermik (revalidering) ingerlataqartutit imaluunniit pikkorissartutit
• Pisortanit aningaasatigut ikiorserneqarnissaq, pisinnaasoq suliffeqanngikkallarnermi ikiorsiissutinik pisartagaqarnikkut, pisortanit ikiorsiissutinik pisartagaqarnikkut imaluunniit sulitilluni ajoqusersimanermut sillimmasiisarfimmit taarsiiffigitinnikkut

Pisinnaatitaaffigisannullu aamma ilaassapput pisussaaffiit. Suliffissaaleqisutut nalunaarsorneqarsimatillutit assersuutigalugu pisussaaffigissavat:

• Suliffeqarnermut piareersimasuunissat
• Suliffissaaleqinerit ingerlaavartumik uppernarsartarnissaa

Pisussaaffigisatit naapertunngikkukkit suliffeqanngikkallarnermi ikiorsiissutinik pisartagaqarsinnaatitaanerit annaassavat sapaatit akunnerini sisamani. Taanna taaneqartarpoq mattunneqarallarnermik.

Malugiuk

Suliffissaaleqisutut nalunaarsorneqarsinnaavutit ullormit suliffissaaleqilerfiusumit siullermit. Nammineq soqutigisarissavat sapinngisamik piaartumik nalunaarsorneqarnissat, tamatumani pisortanit ikiorsiissutit kingumoortumik atuutilersumik tunniunneqarsinnaasanngimmata.

Suliffissarsiuussisarfiup sulianik suliarinnittartui suliatik pillugit nipangiussisussaatitaapput. Imaappoq akunnissinni eqqartukkasi suulluunniit akunnissinniiginnassapput.