Suliffissaaleqisunik sulilersitsineq
Arlaannik pissuteqartumik suliffiit annaasimagukku imaluunniit iliniagaqareernerpit kingorna suliffissaaleqilersimaguit isumagissavat suliffissaaleqisutut nalunaarsorneqarsimanissat. Taamatut nalunaarsugaaguit pisinnaatitaaffeqarlutillu pisussaaffeqartitaassaatit. Pisussaaffivit ilagissavaat suliffeqarnermut piareersimasussaatitaanissat. Ilaatigut tamanna ima isumaqarpoq sulilersinneqarsinnaassasutit.
Sulilersinneqarnermut aamma ilaasinnaapput
- ilinniagaqalerneq ilinniagaqaqqinnerlu
- aammalu kommunip aaqqissugaanik sulilersitsinermut suliniummi suliffissaqartinneqarneq.
Kommunip sulilersitsinermut suliniutigisai pilersinneqarlutillu, ingerlanneqarlutillu aningaasalersorneqartarput kommunimit pineqartumit imaluunniit kommunit arlallit peqatigiillutik suleqatigiinnerisigut.
Sulilersitsinermik suliniummut peqataassaguit piumasaqaataavoq:
- Peqqissutsikkut ajornartorsiuteqassanngitsutit
- Inuttut allatigut atugarisatigut tamatumunnga aporfissaqassanngitsutit
Inuit sulilersitsinermik suliniutinut peqataatinneqartut suliniutip ingerlanerani suliffeqarnermut piareersimasussaatitaassapput. Tamannali suliniutip ingerlanerani ilinniagaqarnermik ingerlataqartunut piumasaqaataanngilaq.
Piffissami sulilersinneqarnerpit nalaani aningaasarsiaqartinneqassaatit. Aningaasarsiaqartuartillutillu suliffeqanngikkallarnermi ikiorsiissutinik pisartagaqarsinnaanngilatit.
Malugiuk
Sulilersinneqarnissamik neqeroorummik pissutissaqarnak akuersiumanngikkuit aningaasatigut ikiorserneqarnissamut pisinnaatitaanerit sapaatit akunnerini sisamani annaassavat. Tamanna taaneqartarpoq mattunneqarallarnermik. Sapaatit akunneri sisamat pineqartut qaangiuppata suliffeqanngikkallarnermi ikiorsiissutigisinnaasassatit nutaamik naatsorsorneqassapput. Imaappoq, ikiorsiissutissarsiassatit ikinnerulissapput
