Suliffissamut innersuunneqarneq
Suliffiit arlaannik pissuteqartumik annaasimagukku imaluunniit ilinniagaqareerlutit suliffissaaleqisunngorsimaguit isumagissavat suliffissaaleqisutut nalunaarsorneqarsimanissat. Suliffissaaleqisutut nalunaarsorsimatillutit pisinnaatitaaffeqarlutillu pisussaaffeqassaatit. Pisussaaffivit ilagissavaat suliffeqarnermut piareersimasussaatitaanissat. Tamanna ilaatigut ima isumaqarpoq suliffissamut innersuunneqarsinnaasutit.
Suliffissaq innersuunneqarfiusoq tassaavoq utaqqiisaagallartumik atorfik suliffissarsiuussisarfimmit innersuussaq. Taanna assersuutigalugu meeqqerivimmiusinnaavoq, utoqqaat illuanni imaluunniit allarluinnarmi. Suliffik innersuunneqarfiusoq aqqutigalugu sulisitsisunut attaveqarsinnaalissaatit tassuunakkullu aalaakkaasumik suliffittaarnissannut periarfissatit pitsaanerulersillugit.
Suliffissamut innersuunneqartussanngoruit suliffissarsiuussisarfiup toqqaannartumik imaluunniit telefonikkut attaveqarfigissavaatit.
Suliffissamik suugaluartumilluunniit tigusisinnaassaatit, tamatumani assersuutigalugu
- peqqissutsikkut ajornartorsiuteqanngikkuit,
- meeqqerinissakkut ajornartorsiuteqanngikkuit
- imaluunniit inuttut allatigut ajornartorsiuteqanngikkuit
Peqqissutsikkut ajornartorsiuteqarnerit pissutigalugu suliffissatut innersuussaq tigusinnaanngikkukku piginnaanngorsaaqqinnermik (revalidering) ingerlataqarnissamik neqeroorfigineqassaatit.
Atorfiit ilaat, assersuutigalugu meeraaqqerivimmi ikiortaassagaanni, pillagaasimanngitsutut allagartaqarnissamik aamma meeqqanik isumassuisinnaatitaanermik uppernarsaateqarnissamik piumasaatitaqarfiusarput. Immersuiffissiaq suliffissarsiuussisarfimmi pissarsiarisinnaavat, uppernarsaatillu pineqartut pissarsiariniarukkit taanna politiinut tunniutissavat. Iluaqutaassaaq suliffissarsiuussisarfimmut suliffissaaleqisutut nalunaarsorneqarumallutit saaffiginneqqaarninni immersuiffissiaq pissarsiarereerukku.
Piffimmi sulinippit nalaani aningaasarsiaqassaatit. Aningaasarsiaqartuartillutillu suliffeqanngikkallarnermi ikiorsiissutinik qaavatigut pissarsisinnaanngilatit. Pisortanit ikiorsiissutinik pisartagaqaruit taakku naatsorsorneqartuassapput pisariaqartitannik naliliinerit tunngavigalugit.
Malugiuk
Suliffissatut innersuussamik pissutissaqarnak akuersiumanngikkuit aningaasatigut ikiorserneqarnissamut pisinnaatitaanerit sapaatit akunnerini sisamani annaassavat. Tamanna taaneqartarpoq mattunneqarallarnermik. Sapaatit akunneri sisamat pineqartut qaangiuppata suliffeqarnermi (suliffissaaleqinermi) ikiorsiissutigisinnaasassatit nutaamik naatsorsorneqassapput. Imaappoq, ikiorsiissutissarsiassat ikinnerulissapput pissutigalugu sapaatit akunnerini kingullerni sisamani isertitaqarnikunnnginnavit.
