Pissutsit tamarmik ajunngikkaluarpata Kalaallit Nunaanni kikkut tamarmik sulinermikkut imminnut pilersorsinnaasussaagaluarput. Suliffeqanngikkuit najukkanni suliffissarsiuussisarfimmut saaffiginnissaatit. Tassani aqqutissiuunneqarsinnaavutit sulilernissannut periarfissatit qanoq pitsaanerulersissinnaanissaannut.

Suliffissarsiuussisarfiup Kalaallit Nunaanni suliffeqarfinnut aalajangersimasunut arlalialunnut qinnuteqaatit aqutarai. Suliffeqarfiit pineqartut tassaapput:

• Mittarfeqarfiit – Grønlands Lufthavnsvæsen
• Greenland Contractors
• ISS
• Royal Arctic Line
• Aatsitassarsiorfiit

Suliffeqarfiit/suliffeqarfiusinnaasut taakku ilaat suliffigissallugu soqutigigukku qinnuteqarnissamut immersuiffissiaq suliffissarsiuussisarfimmi pissarsiarisinnaavat. Qinnuteqaammi paasissutissiissutigissavatit:

• Inuup normua
• Ateq
• Najugaq
• Atuarsimaneq
• Ilinniagaqarsimaneq
• Pikkorissarsimaneq
• Inuussutissarsiutitigut misilittakkat, peqarpallu sulisitsisorisimasanit oqaaseqaatit
• Inuttut atugarisanut tunngasut allat, assersuutigalugu ilaqutariissutsikkut-, ineqarnikkut- aamma peqqissutsikkut atugarisat
• Pinerluuteqarsimannginnermut allagartaq/uppernarsaat

Piumasaqaataanngilaq, kisianni qinnuteqaatinnut iluaqutaassaaq qinnuteqaatitut immersuiffissiaq nammineq qinnuteqaatinnik ilassuteqarfigigukku. Kommuneqarfik Sermersooq-p nittartagaani takusinnaavatit siunnersuutitsialaat nammineq qinnuteqaatit qanoq imaqartariaqarneranik.

Suliffeqarfiit qinnuteqaatit pillugit assigiinngitsunik suleriuseqartarput, taakkulu pillugit annerusumik paasisaqarsinnaavutit suliffissarsiuussisarfimmi.


Suliffisat allat
Suliffissarsiuussisarfiup suliffissat allat pillugit aamma aqqutissiuussinnaavaatit. Suliffissarsiuussisarfiit sinerissami tamanit sulisussarsiornermut allagarsiissutit pissarsiarisarpaat. Suliffissat taakku arlaannut soqutiginnikkuit aqqutissiuunneqarsinnaavutit qinnuteqaatit sumut qaqugulu nassiussinnaanerit pillugu, aammalu qinnuteqaatinnut suut ilannguttariaqassaneritit.


Malugiuk
Suliffeqareeruittaaq allamulli nuunnissat kissaatigalugu suliffissarsiuussisarfimmut aamma saaffiginnissinnaavutit. Tassani suliffissanut katersuiffimmut allatsissinnaavutit, taamaasilluni suliffissarsiuussisarfiup paasissutissaatitit pigeriissammagit sulisitsisut arlaat ilittut piginnaasalimmik sulisussarsiorluni noqqaassappat.