Attaveqarfik

Kommuneqarfik SERMERSOOQ Paamiut Poul Ibsensvej 6, B-679
Postbox 93
3940 Paamiut Tlf.: +299 36 76 00 Fax: +299 68 14 48
E-mail: Ammasarfii
Ataasinngorneq - Sisamanngorneq 10 - 14
Tallimanngorneq 10 - 15
  • Attaveqarfik peeruk

Paamiut oqaluttuassartamerngat

Paamiut illoqarfiat 1742-mi tunngavilerneqarpoq, taamani Frederikshåb-imik ateqarluni. Ullumikkut 1900-it missaannik inoqarpoq, Arsuk nuanaqarfittatualluni.
Paamiut Kuannersuup kangerluata ammarngani inissisimavoq, illoqarfiullu atia aamma isumaqarluni ammanerata paavani najugaqartunik.

Kitaani illoqarfiit allat assigalugit ukiukkut imaq sikuneq ajorpoq, taamaammat Paamiuni Arsummilu aalisarneq pingaarnertut inuussutissarsiutigineqarpoq. Taamatullu ukioq kaajallallugu sinersortaammit tikinneqarsinnaavoq, kisiannili sikorsuit angallannermut aalisarnermullu aasaanerani akornutaasinnaasarput.
Sikorsuit alutorsaataasarput aasaaneranilu angalanermi assut kusanartarlutik. Sermersuaq tikillugu angalaarsinnaneq periarfissat ilagaat.
Ukiakkut angalaartilluni arfernik takunissaq qularnanngilluinnarpoq. Arferit naliginnaasumik takuneqarsinnaasut tassaassapput, tikaagulliit, tikaagulliusaat, aarluit, qipoqqaallu.
Takusassanilu qularutissaanngitsut ilagaat nattoralissuit angisuut kusanarluinnartut illoqarfik imarlu qulaavaallugit timmisut.
Qaqqani pisuttuaraanni pinngortitarsuanni misigisassaqaqaaq, nipaassuserlu nalissaqanngitsoq pinngortitarsuami ilisarnaataalluarpoq.
Illoqarfik aamma allatigut pisuussuteqarpoq. Imarsiornermik ilinniarfik kisiartaasoq illoqarfimmi inissisimavoq, taamatuttaarlu illoqarfik Kalaallit Nunaanni kisiartaalluni naneruusiorfeqarpoq nuna tamakkerlugu tuniniarneqartartunik. Katersugaasivik allanngorartunik takutitassanik peqarpoq, soorunalimi aalajangersimasunik aamma peqarluni, tamatumani Paamiut illoqarfiata piffissap ingerlanerani ineriartornera takuneqarsinnaalluni.
Paamiut oqaluffiat Kalaallit Nunaanni oqaluffiit qisummik sanaajusut kusanarnersaasa ilagaat, 1909-mi sananeqartoq. Sapaatit tamaasa nalliuttunilu naalagiartoqartarluni.
Illoqarfik arlalinnik assigiinngitsunik nioqqutilinnik pisiniarfeqarpoq, ulluinnarni atugassaniit pinnersaatinik pisattanillu nioqquteqarfiusunik.

Kalaalimineerniarfik aalisakkanik neqinillu nutaanik ullut tamaasa nutaartugassaqartitsivoq. Piniartut pisarisimasaat apeqqutaatillugit allanngorarsinnaasarput, aavarfinngoraangallu tuttunik nutaartugassarsisoqarsinnaasarluni.