Illoqarfittut ikinngutigiinnermi isumaqatigissut nutaaq

Asii Chemnitz Narup-ip illoqarfittut ikinngutigiinnermi isumaqatigiissut atsiorpaa.

Borgmesterit marluk nuannaaqisut, Asii Chemnitz Narup, Kommuneqarfik Sermersooq aamma Henning G. Jensen, Aalborg Kommune, illoqarfittut ikinngutigiinnermi suleqatigiissutissatut siunnissatik nutartikkat, Aalborg-imik Nuummi ulloqartitsineq iluatsilluartoq naggaserlugu ullumi atsioqatigiissutigaat.

Asii Chemnitz Narup- ip nuannaarluni Aalborg-ip kommuneata borgmesteria Henning G. Jensen qutsavigaa, illoqarfittut ikinngutigiinnermi suleqatigiinneq, Nuup kommunerisimasaanit aamma Aalborg-ip kommunianit aallartinneqarsimasoq, nangillugu nutarsarlugulu suleqatigiinnertik ingerlateqqissinnaagamikku.

Suleqatigiissutissat assigiinngitsut isumaqatigiissummi nutarsarlugit suliarineqartut, kulturikkut politikkikkullu kiisalu misilittakkanik paarlaasseqatigiinnikkut ingerlanneqartartussat, Asii Chemnitz Narup-ip nuannaarutigai.

Henning G. Jensen qujalluni oqaaseqarnermini usorsisimaarpoq Aalborg-ip kommuneata Kalaallit Nunaanni illoqarfiit pingaarnersaat, illoqarfik nutaamik eqqarsarnermik anersaaqarluni ineriartupiloortoq, pitsaasumillu periarfissaqarfiulluni siunissamut ingerlasoq illoqarfittut ikinngutigisinnaammagu.

Ikinngutigiinnerup tunuliaqutaa

Nuup Kommunerisimasaani borgmesteriusimasup, Agnethe Davidsen-ip maannalu Alborg-imi borgmesteriusup Henning G. Jensen-ip illoqarfittut ikinngutigiinnissamik isumaqatigiissut 2002-mi atsioqatigiissutigaat. Atsioqatigiinnermi tassani siunnerfigineqarpoq Nuup aamma Aalborg-ip akornanni attaveqatigiinnerup annertusarneqarnissaa.

Isumaqatigiissut illuatungeriinnut pisussaaffiliivoq, inuussutissarsiornikkut, ilinniartitaanikkut, ilisimatusarnikkut, kulturikkut, takornariaqarnikkut kiisalu pisortat ingerlatsiviini siuarsaanikkut suleqatigiissuteqarnissamik.

Illoqqortoormiut, kommunit kattussuunnerisa kingorna Kommuneqarfik Sermersuumut ilannguttoq 1963-imli Aalborg-imut attaveqaateqalersimavoq, ilaatigut meeqqat atuarfiini atuartunik paarlaasseqatigiittarnikkut.

Illoqqortoormiuni atuartut 2006-imi kingullermik Aalborg-imiipput.

Allattoq: Else Jensen
Assiliisoq: John David Eriksen