Aallarnisaasut aningaaserivinni naapissapput

Kommuneqarfik Sermersuumi Inuussutissarsiutinik Inerisaavik qaammammut ataasiarluni suliffeqarfinnik aallarnisaasunut suliffeqarfinnullu mikisunut annerumaanullu arlaqalersunik aaqqissuussisarpoq. Maannakkut isumaqatigiissuteqarnermi aningaaseriviit ataatsimiinnerni taamaattuni peqataasalissapput.

Inuussutissarsiutinik Inerisaavimmi pisortaq Marie Fleischer naapertorlugu aningaaseriviit taamaasillutik akisussaaffimmik tigusipput illoqarfimmilu inuussutissarsiortunut iluaqutaassaqaaq inuussutissarsiornerup pitsaanerulersinneqarnissaanut peqataallutik suliniartunut aningaaseriviit taamatut tapersersuisalernerat.

BankNordikip suleqatigiinneq aallarnerlugu oktobarimi aaqqissuussineq aningaaserivimmini ingerlappaa qulequtaralugu "Isumassarsiullaqqissuseq". Suleqatigiinneq pillugu BankNordikimi immikkoortumi pisortap, Bjartur Nolsøep, BankNordikimi isumartik imatut oqaluttuaraa:

- soqutinnilluarpugut annertusaasoqassappat aamma suliffeqarfinnik nutaanik aallartitsisoqassappat, taava pingaartuuvoq aallarnisaasunut aamma oqallittarfeqarnissaq, nangillunilu oqarpoq:

  - Periarfissatsialattut isigaarput aamma uagut inuussutissarsiornermi siunnersortigut peqataanissaat peqataasunillu aallarnisaasunit apeqqutinut akissuteqartarlutik.

Uani qaammami GrønlandsBANKEN-ip siullerpaamik aallarnisaasunut matuni ammarpagit Danmarks Eksportråd peqataassaaq, taakkulu aamma aaqqissuussinermi peqataanissartik nuannaarutigaat:

- GrønlandsBANKEN Kalaallit Nunaanni inuussutissarsiortunut siunnersuisartutut ukiorpassuarni  misilittagarpassuaqarpoq, tamannalu aallarnisaasunut aamma suliffeqarfinnut siunnersorneqarnissamik pisariaqartitsisunut tamanna iluaqutaassaaq. Qujalluta akuersaarpugut aallarnisaasunik ataatsimiisitsinissat ilaat illuutitsinni ingerlanneqarnissaannut neqeroorfigineqaratta. Taamatut iliuuseqarneq aningaaseriviup inuiaqatigiinnut akisussaaqataaneranut ilaavoq, sulissutigissavarpullu sapinngisamik amerlanerpaat aallartilluarnissaat suliffeqarfittullu pitsaasutut peqataalluartutullu ineriartornissaat aamma suleqataaffigissallutigu, John Jakobsen, GrønlandsBANKEN-imi taarsigassarsisitsisarnermi pisortaq, taamatut oqarpoq.  

Allattoq: arkl

Assiliisoq: Inuussutissarsiutinik Inerisaavik 

Nutserisoq: AKAPOL/ v. Elisabeth Lyberth