Nunaqarfimmi namminersortutut periarfissat

Namminersortunngorniarluni takorluugaqaraanni aqqutissat suuppat? Inatsisit qanoq oqarpat? Apeqqutillu allat Kapisilinni innuttaasut tikeraarneqaramik paaserusutaasa ilagivaat.

Kapisilimmiu Poul Lukassen, umiatsiaararsorluni aalisartuullunilu piniartuunermi saniatigut pisiniarfeeqqamik ingerlataqarpoq, annertusarnissaanik takorluugaqarfigisaminik.

- Umiatsiaararsorlunga aalisartuunerma piniartuunermalu saniatigut pisiniarfeerannguamik ingerlataqarpunga unnuisarfittalerlugu annertussaavigerusussinnaasannik. Taamaattumik paasissutissiineq alloriaqqinnissamut nakussassaataavoq, nutaanillu paasissutinneqarnera aallaavigalugu takorluukkama anguniarnissaanut ingerlaqqissinnaanngorpunga.  

Piginneqatigeeriaatsit APS aamma A/S-it pillugit inatsisileritooq INA:NUNA-meersoq Miki Lynge saqqummiussivoq, kiisalu kommunimi inuussutissarsiornermut siunnersorti Kathrine Rosbach namminersortutut aallartikkusukkaanni periarfissat aqqutissallu suunersut pillugit saqqummiussilluni.

Paasissutissiinermi peqataasut sisamaannaagaluartut saqqummiisut saqqummiivigineqartullu periarfissamik iluarisimaarinnipput. Aaqqissuussineq arfininngornermi novembarip ulluisa aqqaneq-aappaanni ingerlanneqarpoq.

Allattoq: Else Jensen

Assit: Inuussutissarsiutinut Inerisaavik