Attaveqarfik

Kommuneqarfik SERMERSOOQ Kommunikationsafdelingen Kuussuaq 2
Postboks 1005
3900 Nuuk Tlf.: 36 70 00 Fax: 31 11 51
E-mail: Ammasarfii
  • Attaveqarfik peeruk

Nuummi iluatsittumik angallannikkut pissutsit

Politikkikut anguniakkap, tassalu Nuup illoqarfiani isumannaatsumik iluatsittumillu angallannikkut periuseqarnissaq aallaavigalugu Kommuneqarfik Sermersuumi Sanarfinermut Avatangiisinullu Ingerlatsiviup suliaminik killiffimminik, kommunalbestyrelsip immikkut ittumik ataatsimiinnerani oktobarip ulluisa 25-anni pisumi, saqqummiussivoq.

Ataatsimoorussamik angallannikkut periarfissanik atorluaaneruneq, pisuinnaat cykkilertullu aqqutaannik pitsaanngorsaaneq, illoqarfiup qiterpasissuani angallanneq annikinnerusoq, kiisalu illoqarfiup iluani aqquserngit isumannaallisarneqarnerisa pitsanngorsaavigineqarnissaat pingaarnertut saqqummiunneqarput.

Biilertarnerup annikillisinneqarnissaa pilerinarsarneqassappat ingerlatsivik tallimanik innersuussuteqarpoq:

  • Illoqarfiup qiterpasissuani angallannerup annikillisarneqarnissaa pimoorullugu sulissutigineqassasoq, ilaatigut uninngaffissalersuinikkut anguneqarsinnaalluni. Kuussuaq aqqutigalugu ingerlaartarnerup unitsinneqarsinnaanera periarfissaasinnaasutut maanna misissorneqaleruttorpoq.
  • Nuup Bussii tapersersorneqassasoq atuartut kiisalu nalinginnaasumik bussit ilaaffigineqartartut ataatsimoorussamik atorneqarsinnaanera aqqutissiuunnerisigut, taamaalilluni bussiutileqatigiiffiup aningaasat amerlanerusut atunngikkaluarlugit pissarsiaqarnerusinnaassammat, ilutigitillugulu tamanit atorneqarnerulersinnaallutik
  • Pisuinnaat cykkilertullu aqqutaasa pitsanngorsaavigineqarnissaat anguniarlugu  pilersaarusiortoqassasoq
  • Pisuinnaat motorilinnillu aqqusinikkut angallattut immikkoortinnissaasa pimoorunneqarnissaat, angallannermi isumannaatsuunissaq annertunerusoq anguniarlugu
  • Sumiiffinni assigiinngitsuni ajutoorfiukkajuttut suli annertunerusumik iliuuseqarfigineqassasut

Aqqusinikkut angallannikkut pitsaanerusumik isumannaannerusumillu angalasinnaaneq anguneqassappat innuttaasut isiginnittaasaannik allanngortitsiniartoqartariaqarpoq, aqqusinertigut angallanneq pillugu paasisitsiniaanikkut kiisalu pitsaasumik illoqarfiup iluanik pilersaarusiornikkut.

Aqqusinermi angallannermi motorilinnik atuisut 3000 missaanniittut ullumikkut Nuummi nalunaarsorneqarsimapput, aamma aqquserngit angallavigineqarnerpaat ulloq unnuarlu 16.000-eriarlugit aqqusaarneqartarput.  

Nuummi aqqusinertigut angallannerup pitsaasup anguneqarnissaanut pilersaarutit kommunalbestyrelsimi aappassaanerlugit oqaluuserineqassapput.

Allattoq: Else Jensen

Assiliisoq: Toqqorsivik / John David Eriksen