Paamiuni takornarialerinermik siuarsaaneq nangillugu

Peqataasut tunorlerni saamerlerniit: Erik Lorentzen, Eigil Knudsen, pikkorissartitsisoq Frederik Lundblad, Filippine Møller, Augustine Rosing, Takornarialerinermut siunnersorti Helga Lorentzen, Bibi Stenskov. Saarlerni saamerlerniit: Emilie Lorentzen, Else Thorsen, Ulrik Mathiesen aamma Henriethe Boassen.

Pikkorissartitsisoq Frederik Lundblad, Qaqortumi Niuernermik Ilinniarfimmeersoq naliliivoq: 

- Peqataasut piumassuseqartorujussuupput. Niuerluarnissaq siunertaralugu assigiinngitsunik iliuuseqarnissaq siunniunneqarpoq. Ilaatigut nunaqqatigiit unnussiuaartillugit takornarialerinermi siunniunneqartunik paasissutissinneqassasut, tamatumani anguniarlugu nunaqqataasut   takornarialerinermik aallutallit amerlisarnissaat.

Frederik Lundblad-ip ilanngullugu oqaatigaa pikkorissarnermi peqataasut suliniuteqarlutik aallartereersut, ilaatigut pitsaaliuinermik siunnersorti peqatigalugu meeqqanut inuusuttunullu sammisumik maangaannaq eqqaasarneq iliuuseqarfiginiarneqarluni.  

Illutoqqat kusanartut eriagisassallu, umiarsualiveqarfiup eqqaaniittut, aserfallatsaaliuarneqarnissaat kissaatiginartikkini taassuma aamma oqaatigaa, taamaaliornikkut takornarianut takutitsilluarnissaq aamma anguneqassammat.

Pikkorissaqataasut sapaatip akunnerata ingerlanerani assigiinngitsunik suliassaqartinneqarput, soorlu takornarianut misigisassarsiortitsinerup iluani periarfissanik qulaajaasinneqarlutik.   Umiarsuit takornariartaatit tikinnerini periarfissanik amerlisaanissaq ilaatigut siunniunneqarluni.

Nattoralik ilisarnaatitut

Paamiuni takornarialerinermi immikkuullarissutsip suunera eqqartorneqartut ilagaat. Nattoraleqarfittut ilisarnaateqartinneqartarnerup, kommunit kattussuutinngikkallarmata aamma kommunip ilisarnaatigisimasaatut, takornariaqarnermi nittarsaassinermi tammajuitsussanillu niuernermi nattorallip ilisarnaatitut atorluarneqarsinnaanera pissusissamisoortutut isigineqarpoq. 

 Takornarialerinermi siunnersorti, Helga Lorentzen-i pikkorissartitsinermik aamma iluarisimaarinnippoq:

-Takornarialerinermi aaqqissuussinikkut nittarsaassinikkullu eqqumaffigisassanik, aamma   suleqatissarsiorsinnaanikkut misigisassarsiortitsisinnaanikkullu nutaanik  ujartuinermik pissarsiaqarfiuvoq. Peqataasut piumassuseqarluarnerat aallaavigalugu isumannanngilluinnarpoq angusaqarluarnissaq piumaartoq, aasamullu umiarsuarnik takornariartaatinik tikeraartoqarnissatsinnut piareersimalluarumaartugut nalorninanngilaq. 

Allattut: Helga Lorentzen / Else Jensen

Assi: Salomon Therkildsen, Paamiut