Periarfissaq alutornavissoq

Borgmesteri illussanik titartaasartunik oqaluussisoq.

Danskit kalaallillu illussamik titartaanermi suliniutaat, qulequtalik "Future Greenland", ulluni tulliuttuni danskinik kalaallinillu suliniummi peqataasunit ingerlanneqartussaq Nunatsinnilu siunissamut takorluukkanik Nunarsuarmioqatitsinnut takutitsisussaq, ippassaq marlunngornermi novembarip ulluisa arfineq-pingajuani aallarnerneqarpoq.

Illoqarfiit inunnut

Suliniummi peqataasut marlunngornermi ullup qeqqata siornatigut ulapputilerput allattaavimminnut allattuillutik. Suliap aallartivinnginnerani borgmester Asii Chemnitz Narup saqqummiisussarpaalussuarni aallarniisuulluni paasissutissiinermik isummernartunillu imalimmik saqqummiilluni.

Borgmesterip nuannaarutiginerarpaa Dansk Arkitektur Centerip suliniut tamanna peqataaffigissallugu toqqarsimammagu, periarfissatsialattut pisutullu nuannaarutissaasutut isiginerarlugu.

- Ullutsinni inuuniarneq allaavoq. Paquminartut oqaluuserisalernikuuvagut, ataatsimoornerpullu nutaamik eqqarsarfigisinnaalersimavarput. Kalaallit Nunaannut nutaaliaasoq anguniarlugu pingaarutilinnik aalajangiisarpugut, borgmesterip oqalugiaatini aallarnerpaa. Ilutigalugu aamma oqaluttuaraa suut tamaasa ataatsimuussuseqarnerat pillugu eqqarsariartaaseq kalaallit kulturiannut ilaajuartoq, tamannalu suliniutini tamakkunatut ittuni eqqarsaatigineqartariaqartoq.

Najuuttut kalaallit atugarisaat pillugit aamma kommuneqarfik assigiinngiiaassuseqarfiusoq, Kommuneqarfik Sermersooq, pillugu saqqummiussamik tusarlerneqarput, atugarisat pissutsillu assigiinngitsorpassuit atorneqartut, aamma ineqarneq eqqarsaatigalugu.

Borgmesterip pingaartillugu erseqqissarpaa illoqarfiup aamma ineqarnerup ineriartortinneqarnissaanni qitiutinneqartussaq tassaasoq inuit inuunerannut avatangiisit pitsaasut kiisalu aamma ilorlikkut aamma avataatigut inuuneq imminnut ataqatigiissasut. Nunatsinni illuliortitsitsisarnerni siornatigut kukkunerusarsimasut uteqqinneqassanngillat, tamannalu anguniarlugu kalaallini inuiaqatigiinni paasinninnissaq pisariaqarpoq.

Suliniut

Asii Chemnitz Narupip saqqummiussinnginnerani DAC-p pisortaanera Kent Martinussen tikilluaqqusivoq suliniullu naatsumik saqqummiullugu. Kent Martinussen naapertorlugu suliniummi peqataasut eqimattakkuutaartinneqarput immikkoortunut qitiuffiusunut assigiinngitsunut sisamanut agguataarneqarlutik, taakkulu suliaasa inernerat Arkitektbiennalet 13-issaanni Venedigimi 2112-imi ingerlanneqartussami saqqummersinneqassaaq.

Siullermilli eqimattakkuutaat ilisimasat paasiniartussaavaat, nassuerutiginninnerit pissarsiaralugit aamma ullumikkut kalaallit qanoq inissisimanerat saqqummiullugu Kalaallit Nunaata siunissaa pillugu siumut isiginiarlutik takorluukkanik saqqummiussinnginnerminni. Tamanna ilaatigut ullumikkut ingerlanneqassaaq eqimattakkuutaat assigiinngitsut workshopissallutik sulissallutillu.

Allattoq assiliisorlu: arkl

Nutserisoq: AKAPOL/ v. Elisabeth Lyberth