Qilanaarnerup nuannersup nalaa

Kommuneqarfik Sermersuumi borgmesteri, Asii Chemnitz Narup-i, najuuttorpassuarnut tikilluaqqusivoq, oqaluttuaralugulu orpimmik ikitsigamik siorna siallerlunilu maqulluinnaasoq, maanna killormoortuanik orpimmik ikitsinermi qulinik issimmat marloriaataatut issittutut misinnartumik, orpiullu ikinneranut atasunik oqaaseqarnermini ilaatigut ima oqarpoq:   

- Juullimut pikinerup ilisarnaataasa ilaat, qilanaarnerup saniatigut tassaavortaaq ikioqatigiinneq, ataatsimoorneq, utoqqaat meeqqallu peqatigiinnerat – ileqqutoqqanik ingerlatitseqqillutik ilaatigullu aamma nutartilaartakkaminnik.

Ilanngullugulu oqaatigaa pingaartitamik ataatsimoorfeqarnerup kiminga juullilernerit tamaasa uppernarseqqittutut ittaripput, nangillunilu:

- Nunaqqatigiittut ilaqutariittullu inooqatigiinnitsinni qanortoq pissutsit taakku eqqaamasarisigit – aamma juullip ullui qaangiussimaleriarpata.

Kommuneqarfik Sermersuumi sumiiffinni tamaniittut borgmesterip ilanngullugit inuulluqquai, sapaammi matumani aamma sumiiffimminni orpimmik ikitsisut eqqaamallugit.Illoqarfiit pingaarnersaanni orpik pisarneq malillugu Nuup illoqarfittut ikinngutaanit Lungby-Taarbæk-ip kommunianit tunissutaavoq.  

Juullip inua meeqqanullu tunissut

Juullip inua ulapikkaluaqaluni Nuummi orpiup ikinnerani soorunami takkunnissaminut aamma piffissaqarpoq, qamusisanngikkaluarlunili nutaaliaalluinnartunik motoorilinnik angallaserluni meeqqanit nuannarineqaqaluni takkukkami. 

Mike Fencker Thomsen guitarilerluni aliikkusersuivoq, juullimut erinarsuusiaminik nutaamik aamma appisimaarluni.    

Filmi "Arthurs julegaveræs" atuartunut Katuami takutinneqassaaq, ataasinngornermi decembarip ulluisa tallimaaniit pingasunngorneq decembarip ulluisa arfineq-aappaat ilanngullugu takutinneqartussaq. Ulluunerani paaqqinnittarfinniittartut poortugaaqqanik peqqinnartunik mamakujuttugassaminnik agguaavigineqassapput, sapaatip akunnerata uuma ingerlanerani.

Meeqqat ulluunerani paaqqinnittarfinniinneq ajortut Innuttaasunik Sullissivimmut saaffiginninnikkut aamma poortugaaqqanik tunineqassapput, aamma sapaatip akunnerata uuma ingerlanerani.   

Allattoq: Else Jensen

Assiliisoq: John David Eriksen