Rasmine inuusuttut pillugit takorluugaqarpoq

- Qangali N.U.I.F-ip siunertaa torraginikuullugu maanna nammineq ingerlatsinissara pissangageqaara, siunertarlu taanna maliinnarniarpara, Rasmine Geisler oqarpoq.

2011-mut 2012-mullu pilersaarutit inissikkiartuaaleruttorput taakkunanilu   takuneqarsinnaavoq   isiginnaartitsineq, qitinneq, nipilersorneq, pinngortitamik atuineq timersornerlu inuusuttut ornittagaanni ingerlanneqartussatut siunniunneqarsimasut.

Rasminep N.U.I.F inuusuttunut kulturimik ingerlatsivittut ingerlakkusuppaa periarfissaasullu assigiinngitsut atorluarlugit. Soorlu arsaattarfeeqqap nutaap aasaru atorluarneqarnissaa aammalu scaterparkip atorluarneqartorujussuup   ineriartortinnissai takorloorpai. Scaterparkimi atuisuusut klubbitaarnissaat ilaatigut aamma sulissutigerusullugu.

Kommuneqarfik Sermersuumi meeqqat inuusuttullu ornittagaat allat Rasminep aamma eqqarsaatigivai. N.U.I.F-ip siunertaa sumiiffinnut ornitakkanullu assigiinngitsunut siammarusuppaa suleqatigiinnerunissarlu angorusullugu. Inuusuttut ornittagaat inuusuttunut ineriartorfiussapput tamannalu oqariartuutigalugu Rasmine suleqatissaminik paarlaasseqatissaminillu ujartuivoq.

Rasmine inuuvoq eqeersimaartoq sunngiffimminilu aamma meeqqanut inuusuttunullu tunngasunik suliaqartuulluni. Nammineq oqarneratut suliffittaani aqqutigalugu maanna soqutigisani tamakkiisumik sammissavai.

Kommuneqarfik Sermersuup Inuussutissarsiutinut Ingerlatsiviani sulereerluni Kommuneqarfik Sermersuup iluani allamik atorfittaarnermigut meeqqat inuusuttullu silarsuaat sammisussanngorpaa, maanngaanniillu sulilluarnissaanik kissaapparput.

Allattoq assiliisorlu: arkl