Tusagassiuutitigut nalunaarut

Missingersuut 2012 pillugu tusagassiorfinnut saqqummiineq.

2012-2015-imut kommunalbestyrelsip missingersuutini anguniagai pingasuusutanguneqarput, tassalu:

1.   Ingerlatsinernut aningaasartuutit amerlissanngitsut. Isertitat amerlissutaat sanaartornernut imaluunniit suliniutinut innuttaasunut iluaqutaasunut atorneqassasut.

2.   Akileraarutit procentiat 25 %-miitiinnarneqassasoq.

3.   Piffissami missingersuusiorfiusumi ingerlatsinernut sanaartornernullu aningaasartuutit tamarmiusut 7 %-iannik aningaasanik uninngasuuteqarnissamut piumasaqaat naammassineqassasoq.

Angusat tamarmiusut takutippaat Kommuneqarfik Sermersooq 2012-mi ingerlatsinerni ingerlaavartuni 162,9 mio. koruuninik sinneqartooruteqartussaasoq, sanaartugassanullu aningaasaliissutissatut 223,9 mio. koruunit immikkoortinneqarsimasut.

Ilanngaatit peereerlugit 57,9 mio. koruuninik taarsigassarsinissap naatsorsuutigineqarnerata kingunerisaanik missingersuutit akuersissutigineqareersut kommunip aningaasat uninngasuutai 3,1 mio. koruuninik ilanngarneqassapput, aningaasallu uninngasuutigineqartut 2012-ip naanerani 12,9 mio. koruuniunissaat naatsorsuutigineqarpoq.

Piffissami 2012-2015-imi tamarmi missingersuutit qiviassagaanni sipaarniutit allanngortiterinerillu iluaqutigalugit ingerlatsinernut aningaasartuutit tamarmiusut katillugit 4,9 mia. koruuniupput, taakkulu ukiuni tulliuttuni missingersuutini killiliussat - 2011-mut missingersuuserinermi akuersissutigineqartut – amerlaqatigaat, taamaalillunilu ingerlatsinernut aningaasartuutit amerlinnginnissaannik anguniakkat anguneqarlutik.

Akileraarutinit aamma ataatsimoortumik tapiissutinit isertitaqaataanerulersut siorna missingersuusiornermi naatsorsuutigineqartunut sanilliukkaanni piffissami missingersuusiorfiusumi kommunimut tamarmut agguataagassanik sanaartugassanut nutaanut aningaasaliissuteqartoqarsinnaalerpoq. Taamaalilluni piffissami missingersuusiorfiusumi sanaartugassanut aningaasaliissutit tamarmiusut 770 mio. koruuningajaassapput.

Taamatut sanaartugassanik pingaarutilinnik pilersaarusiornikkut kommunimi aningaasanit tigoriaannarnit katillugit 24,6 mio. koruunit atorneqassapput, taakkulu piffissap missingersuusiorfiusup naanerani 100,4 mio. koruuniunissaat naatsorsuutigineqarput – taamaalillunilu aningaasanik tigoriaannarnik 99 mio. koruuniuteqarnissamik piumasaqaatit sinnerneqalaassapput.

Missingersuutit inissitsiterneqarnerannut takussutissaq Kommuneqarfik Sermersuumit innuttaasunut sullissivinnut tamanut nassiussuunneqassaaq, taamaalillutik innuttaasut kommunip aningaasaatai suliassaqarfinnut sanaartugassanullu qanoq agguataarneqarsimanersut takusinnaaniassammatigik.