Titartaasartut nunarput siunissami Ilulissani saqqummiuppaat

Dansk Arkitektur Centerip pilersaarusiaa novembarip qaammataani Nuummi aallartinneqarpoq, suleqatigiit sisamaasut Kalaallit Nunaanneersut aamma nunanit allaneersut peqataaffigisaat siullermeerlutik naapimmata. Tamatuma kingorna nunatsinni kommunit sisamat peqataaffigisaannik pilersaarutit aalajangersimasunik samminniffiusut ineriartortillugit suliarineqarput, kommunit pingaartitaannik killiffiannillu aallaaveqartut.

 Suliniummut peqataasunut borgmesteri Asii Chemnitz Narup-i Nuummi saqqummiussivoq, Ilulissanilu suleqatigiit naapisimaarneranni peqataavoq, malinnaanini aallaavigalugu immersueqataalluni oqalliseqataallunilu.


Ilulissani killiffissioqatigiinneq
 
Pilersaarusiornermut peqataasut marlunngornermi februaarip ulluisa arfineq-aappaaniit sisamanngorneq februaarip ulluisa qulingiluaat ilanngullugu naapeqatigeeqqipput, peqataatitaqartut tamarmik suliamik killiffiannik qanorlu inerniliiviginissaannik saqqummiussuissallutik.

- Qilanaaraarput allat qanoq suliaqarsimanerat takussallugu, minnerunngitsumillu uagut nammineq suliarisimasatta saqqummiunnissaannut qilanaarpugut, silassorissorpassuit maani peqataasut qisuariaataat tusarniassagatsigit, Niels Bennetzen, Kommuneqarfik Sermersuumi illoqarfimmik illuliortiternermillu ineriartortitsinermik immikkoortortaqarfimmi ingerlatsisoq oqaluttuarpoq.
 
Illoqarfimmik Illuliortiternermillu ineriartortitsinermik immikkoortortaq suleqatigiinni najugaqariaatsimik suliaqartumi peqataapput, taamalu Kommuneqarfik Sermersuup kommunimut pilersaarut atuutilersussaq sulinerminnut aallaavigisimallugu.

Suleqatigiiaat tamarmik ulluni naapisimaarfiusuni suleqatigiiaanit allanit, kommunit aallartitaanniit, sulianik ilisimasalinnit avataaneersunit, aamma akisussaallutik suliamik ingerlatsisunit, ujarassiuumit Minik Rosing-imit siuuttuuffigineqartumit oqaaseqaateqarfigineqarlutillu siunnersuutinik tuniorarneqassapput.
 

Killiffissioqatigiinnerup Ilulissani ingerlanneqarneranut pissutaatinneqarpoq titartaasarfiit nunanit allaneersut Nuup avataa aamma misigisaqarfiginiassammassuk. Iluliarsuit avatangiiseralugit ullut ataatsimiinnernut takisuunut atorneqarnerisa saniatigut illoqarfimmi takusassarsiorluni aamma umiatsiamik angalaaluni kiisalu qimussernermut isumassarsiuutigaluni atorneqarput.


Periarfissaq angisooq  

Niels Bennetzen-ip oqaluttuaraa suliniummut ”Future Greenland”-imut peqataaneq illuliortaatsimik suliniummut annertuumut, suliamillu pikkorilluinnartunik sulialinnit  peqataaffigineqartumut maluginiarneqarnissamut periarfissatsialaasoq. Nunarsuarmioqatigiit Kalaallit Nunaannut isiginnileqqanerat pitsaasumik iluaqutissiisumillu kinguneqassanerarlugu.
 
Taamalu aamma kalaallit peqataasut aningaasartuuteqaratik peqataapput, Statens kunstfond aningaasaliisullu allat suliniummut saqqummersitsinissarsuarmullu aningaasaliisuummaata.

Illuliortaatsimik takutitsinissarsuaq Venedig-imi aggustip ulluisa 27-anni ammarneqassaaq, suliniummilu suliat nunarsuarmioqatigiinnut tamanut takutinneqassallutik. Taamalu pissanganassaaq takunnittut qanoq isummerumaarnersut.


Allattoq: arkl

Assiliisoq: John David Eriksen
Nutserisoq: Else Jensen