1.a-kkut borgmesterimik naapitsinerat

Borgmesterip atuartut mikinerit kommunalbestyrelsip suliffiata, ataatsimiittarfiup  isaariaanii naapippai tamaasalu assaasigut eqittarlugit qanoq ateqarnersut apersorpai. Qungujulasorujussuuvoq, nalunanngitsumik innuttaasunit mikisunit pulaarteqarnini nuannarutigigaa.

Emil, Inuuna aamma atuaqataat kommunalbestyrelsimi ilaasortat issiaviinut ingitsiterluarput. Mandarinamik neriitigalutik juicetuutigalutillu borgmesterimit Asii Chemnitz Narup-imit  tikilluaqquneqarput , meeqqallu piareersarsimasaat borgmesterimut apeqqutit akissuteqarfigisaqattaalerlugit.

Meeqqat apeqqarissut
Kommunalbestyrelsi sulerisarpa? Kommuneqarfik Sermersuumi qassit sulippat? Aamma borgmesteri qanoq peroriartorpa? Tamakkuupput meeqqat borgmesterimut apeqqutaasa ilaat.

Nuummi innuttaasut amerlassusaat, biilit aamma illut pillugit apeqqutit tikinneqarmata nipituumik tupigusuppaluttumik meeqqanit oqartoqartarpoq: ”Kaaaar ’!” 16.000-it sinnerlugit inuit, illut 6.000-it sinneqartut aamma biilit 3.000-it sinneqartut tassaapput kisitsisit angisuut meeqqanut 1.klassimi atuartunut.

Kommunalbestyrelsip ataatsimiittarfiani meeqqat issianerat sivitsoriartuinnartillugu borgmesterillu apeqqutiminnut akissutai tusaraangamikkit apeqqarissigaluttuinnarput. Ilaallu namminneq misigisimasaminnik borgmesterimut oqaluttuartarniarlutik.  

Akunneq ataaseq qaangiutilermat piffissanngorpoq inuulluaqqusinissamut. Aniartulerneranni tamarmik refleksimik tunineqarput aqqusinikkut angallannermi takulluarneqarsinnaaneruniassammata. Meeqqat borgmesteri assammillugu inuulluaqquaat pissuserissaartumillu qutsavigalugu naapissinnaasimagamikku.

Meeqqat nipaat aanngarmat borgmesteri issiavimminut ingilluni ulloq ulapaarfiusoq qungujulalluni nangippaa.

Allattoq: arkl
Assiliisoq: John David Eriksen
Nutserisoq: AKAPOL/ v. Elisabeth Lyberth