Borgmesterip Kunngit Pingasut ulluat Tasiilami nalliussissavaa

- Sulisorisatta, kommunip allaffiani suliffeqarfinnilu pulaarlugillu oqaloqatigissagakkit qilanaaraara ulluinnarnilu inooqataalaarnissara qilanaaralugu, borgmesteri oqarpoq.
Borgmesteri tikeraarnermini assigiinngitsorpassuarnik pilersaaruteqarpoq. Ullumi sisamanngornermi januaarip ulluisa sisamaani Kommuneqarfik Sermersuup Tasiilami pisortaaqatigiivi, Lars Göransson Amarngivat-meersoq minnerunngitsumillu illoqarfimmi politikerit naapissavai.

Sapaatip akunnerani Tasiilamiinnermini borgmesterip ilaqutariit illuat, allakkanut nipitittagaarniarfik Filatelia aamma Piorsaavik, utoqqaat illuat, timersortarfik, isertitsivik kiisalu atuarfik pulaartussaavai.

Timersortartut ulluat aamma innuttaasunik ataatsimiisitsineq

Aqagu tallimanngornermi januaarip ulluisa arfernanni, Kunngit Pingasut Ulluanni, pisarnertut Nunatta sinneranisut Tasiilami timersortartut ulluat nalliussineqassaaq. Tassani borgmesteri peqataassaaq allagartanillu nersornaatisiassanik ukioq manna timersullammammut angummut arnamullu tunniussissalluni kiisalu kajumissaammik akissarsisitsissalluni.

- 2011-mi Paamiunukarpunga Kunngit Pingasut Paamiuni nalliussiniarlugu. 2012-imi Kunngit Pingasut Tasiilami nalliussinissaat qangali aalajangerpara. Kunngit Pingasuni juulli naggataartaratsigu, kommunerujussuanngornitsinnilu pingaartippara inoqarfiit amerlasuut tikittarnissaat.
Borgmesteri tikeraarnini naggaserlugu Tasiilami politikerit peqatigalugit innuttaasunik katersortarfimmi ataatsimiisitsissaaq marlunngornermi januaarip ulluisa qulinganni nalunaaqutaq 16.00 – 18.00-ip tungaanut.

Kommuneqarfik Sermersuumi innuttaasunik Tasiilamiittunik oqaloqateqartarnissaq pitsaasumik ataatsimeeqateqartarnissarlu borgmesterip qilanaarai.  

Allattoq: arkl
Nutserisoq: AKAPOL/ v. Elisabeth Lyberth
Assiliisoq: John David Eriksen