Eqqaaniut: Qoorngormioq uummaarissoq toqukkut qimaguppoq

Assiliisoq: Leiff Josefsen.

Adam Lynge inuuvoq uummarissoq, inuuninilu tamaat sammisaqartuartoq kiisalu sorpassuarnik sukisaarsaaruteqartuartoq. Oqalungusiarneq erinarsornerlu nuannarisavissuarai nunaqqataasugullu misigisimasarpassuisa ilisimasarpassuisalu raatiukkut tusarnaarnissai nuannarisimaqaarput.  
Taamatuttaaq aamma tallimanngornermi 21. januar ualilluinnartoq ratiukkut aallakaatitaq peqataaffigisaa,(1993-imi immiussaq) sunaaffa akunnerit ikittuinnaat qaangiunnerini anerningertoq. Naggatissani tikivillugu inuiaqatigiinnut tunniussaqartuarpoq.   

Inunnut akuliuuttuuvoq eqeersimaartoq, sunngiffimminilu peqatigiiffilerineq aamma assigiinngitsutigut aallussimallugu. Ilaatigut peqatigiinniani, sanningasoq tungujortumi aamma utoqqaat innarluutillillu peqatgiiiffianni ilaasortaasimalluni, amerlanertigut siulersuisuni aqutsisooqataasutut.

Ada inuppalaartuugami katerisimaartoqartillugu qiimmassaajuartuusarpoq. Nuimaniartuunngilaq, inuiaqatigiinnili akuunermini inoqatiminit maluginiarneqartarpoq amerlasuunillu tulaaviusarluni, innuttaasunillu inuiaqatiminut soqutiginnittutut  maligassiuisuulluni.

Adam Lynge oktobarip ulluisa 24-ianni 1923-mi Nuup kangerluani Qoorngumi inunngorpoq. Inunngorfini peroriartorfigaa tassanilu nuliani qoorngormioqatini Anne Martha naapippaa, ukiorpassuillu Anne Marthap 2005-imi toquneranut aappariittut ataqatigeeqqissaarlutik inooqatig iillutik. Aappariit arfineq pingasunik meerartaarput, ullumilu amerlaqisunik kinguaaqarput.

Qoorngoq 1971-imi inuerutitinneqarmat ilaqutariit nunaqarfitsik qimallugu Niaqornaarsummut nuupput.
Inuunermili sinnera Adap Qoorngoq uterfigiuarpaa nunataalu ilisimalluarlugu. Ilisimasaqarluarnera naluneqanngilaq tamannalu tunngavigalu oqaasileriffiup Qoorngup eqqaani nunat aqqinik nalunaarsuinerminni ilaatigut suleqatigisimavaa.

Ada aqqanilinnik ukioqartoq ataataa piniartuusoq, Aggu Lynge, toquvoq,  Adalu tassanngaanniit qatanngutini peqatigalugu  ilaqutariit pilersornissai isumagilerpaa,  piniartutut aalisartutullu perorsarneqarluni. Ukiut qulit sinnerlugit qaannamik piniartooreerluni nunami aalisakkerivimmi sulilerpoq kingornalu niuertarfimmi sulisalerluni. Niuertarfimmi sulinini ingerlatiinnarpaa, 1967-imilu Qoorngumi niuertorusinngorluni.

Ada inuuvoq suliumatooq, 69-inillu ukioqarluni soraarninngornini tikillugu Niaqornaarsummi, Kapisilinni Qeqertarsuatsiaanilu niuertorusiuvoq. 1992-imi soraarninngorami nulianilu Nuummut nuupput ilaquttatik kinguaatillu qaninnerulerlugit.

1993-imi Namminersornerullutik Oqartussanit Nersornaammik siilviusumik nersornaaserneqarpoq.

Naapittarneratigut nunaqqataasugut Ada inuttut asannittutut, qanilaartutut aamma ilaqutariinnit katersuuffiusutut ilisarisimavarput. Kommuneqarfik Sermersooq sinnerlugu Adap ilaqutai, ikinngutai nunaqqataalu inummik imaannaanngitsumik annaasaqarneranni misiginneqatigingaarpakka. Nuummi takussaajuarmat maqaasinassaqaaq.

Adap eqqaaneqarnera ataqqinartuuli!

Asii Chemnitz Narup, borgmesteri