IVÆRK’ MESSE 2012

Ulloq taanna saqqummiinerni ilaatigut tusarsinnaavatit atisanik ilusilersuisartoq Bibi Chemnitz qanoq nunani allani atisaliortitsisarnersoq, aallarnisaasut aningaaseriviillu qanoq suleqatigiissinnaanersut, suliffeqarfik alliartortillugu kukkussutit qulit suut pinaveersaartinneqassanersut kiisalu Hummel-ip piginnittua, Christian Stadil, Company Karma pillugu oqaluttuartoq.

- Aallarnisaanissamut annertunerusumik soqutiginnilersitsineq aallarnisaasuunerlu suuneranik paasinninnerulersitsineq aaqqissuussinermi siunertarineqarput, Inuussutissarsiutinik Inerisaavimmi ingerlatsisoq, Marie Fleischer, oqaluttuarpoq.

Taamaattumik aamma Iværk’ messe soqutiginnittunut tamanut ammavoq. Suliffeqarfinnik aallarnisaasut nutaat, anginngitsunik suliffeqarfiutillik, inuit aallarnissaanissamik eqqarsaateqartut allallu aallarnisaaneq pillugu annertunerusumik paasisaqarusuttut.

Soqutiginartunik saqqummiisut nersornaasiinerlu

Borgmester Asii Chemnitz Narup oqalugiarluni nalunaaqutaq 10.00 Iværk’ messe 2012 ammassavaa, Bank Nordik-ilu siullermeertumik aallarnisaasumik nersornaasiinermigut nalunaaqutaq 16.15 ullormut sammisaqartitsineq naggasissallugu.

Marie Fleischer aallarnisaasumik nersornaasiineq pillugu oqaluttuarpoq nersornaaserneqartoq tassaassasoq:

- suliffeqarfik iluatsitsilluarsimasoq allanullu maligassiuilluartoq, aningaasarsiornerpaajunngikkaluartorli.

Ullup ingerlanerani saqqummiisoqassaaq, aammali workshopini pikkorissarnermik ilaqartumik immikkut sammisaqartitsisoqassalluni. Saniatigut aamma aallarnisaasut aallarnisaasunillu suleqateqartartut 15-it Katuami immikkut nerrivilerlutik nikorfajumaarput soqutiginnittunillu tassani orninneqarsinnaajumaarlutik.

Workshopini peqataarusukkuit januaarip qulingiluaat sioqqullugu uunga nalunaassaatit: erhverv@sermersooq.gl.

Iværk’ messemi ullup ingerlanissaa uani takuuk.

Allattoq: arkl

Asseq: Inuussutissarsiutinik Inerisaavik