Iværk´ Messe – suliniut pitsaasoq

Borgmesterip Asii Chemnitz Narup-ip aallarnisaasunut takoqqusaarineq ammarpaa. Inge´s Kager takoqqusaarivimmini. Bibi Chemnitz oqalugiartoq. Christian Stadil oqalugiartoq. Nanoq Consult & Service APS Bank Nordik-ip aallarnisaasunut akissarsiarititaanik tunineqarpoq.

Tuniniaaneq takoqqusaarinerlu, piginnaasanik ineriartortitsineq, siunnersuinermik suliaqarneq, sillimmasiinerit, kukkunersiunerit, IT, aningaasalersuineq, iffiugaarniaq kiisalu oqalugiarnerit assigiinngitsut ullormi matumani peqataasut akornanni naapinneqarsinnaapput. Imminut nittarsaassinnaanermut Danmarkimi siuuttut ilaat, Hummelimi pisortaaneq, Christian Stadil, Company Karma – niuernermi ingerlatseriaaseq, eqqarsaatersuutit periutsllu pillugit oqalugiarpoq Nuummiunit soqutigineqarluartumik.  

Borgmesterip Asii Chemnitz Narup-ip takoqqusaarinermik ammaalluni oqaaseqarnermini isumalluarnera paatsuugassaanngilaq:      

- Katerinneq taanna ukiut tamaasa pisalerpoq. Ukiumiit ukiumut peqataasut amerliartornerat nuannersutut maluginiagassaavoq. Soqutiginninnerup annertusiartornera siunissamut isumallualersitsivoq. Inuussutissarsiutitigut nukittorsaanissaq, siuarsaanissaq nutaaliornissarlu pisariaqarluinnarpoq. Tunisassiorneq annertusartariaqarpoq,  aningaasarsiornikkut siuariartornissaq aqqutissiuuttariaqarpoq, uatsinnut sutigut tamatigut pilersornerunissaq pisariaqartipparput. Tamatumuunakkut iluatitsissagutta inuit nutaanik nassaarsiullaqqissusiat / isumassarsiullaqqissusiat tunuliaqutsertariaqarpoq, inuillu pilersitsinissamut qamuuna pisinnaasaasa pikialaartinnissaannut piffissanngorpoq. Tassuunakkut ikorfartuinissaminut kommunalbestyrelsi piareerssimavoq piumassuseqarlunilu.

Aallarnisaasunut suliniutit assigiinngitsut kommunip aallartinnikuuai siunnersuinikkut, piginnaanngorsarnermik suliniuteqarnikkut, ikorfartuilluni suliniuteqarnikkut, aallarnisaasunut qaammatikkaartumik sammisaqartitsisarnikkut kiisalu inuussutissarsiutit pillugit nittartakkami qupperneqarnikkut.

Suliniut pitsaasoq

Inge´s Kager, qaammatit sisamat matuma siorna aallartittoq, kommunillu aallarnisaasunut illuani inissisimasoq, aaqqissuussineq pillugu iluarisimaarinnippoq.  

- Isumaqarpunga aaqqissuussineq pitsaasuusoq, aallarnisaasunillu allanik naapitsinissamik periarfissiisoq. Inuit allat aallarniinissamik eqqarsaateqartut aamma taamaalillutik apeqquteqarsinnaallutillu aallarniiniarnerminni nalornissutiminnik siunnersorneqarsinnaammata, Inge Lennert, siullermeerluni suliffiutillit / aallarnisaasut takoqqusaarinerannut peqataasoq oqarpoq.

Inge Lennertip ilanngullugu oqaluttuaraa iffiugaarniarnini, kaaginik assigiinngitsorpassuarnik inniminniiviussinnaasoq inuit ilikkariartoraat.     

Bank Nordik-ip aallarnisaasumut akissarsiarititaa

Aallarnisaasut takoqqusaarinerat naggaserlugu Bank Nordik-ip aallarnisaasumut akissarsiarititaa 20.000 koruuninik aningaasartaqartoq Nanoq Consult & Service APS-imut tunniunneqarpoq.

Allattoq assiliisorlu: Else Jensen