Kulturimik nersorinninneq

Kommuneqarfik Sermersuup 2012-imi kulturikkut avammut kiinnertartussaa Nive Nielsen. Nive Nielsen aamma Kimmernaq Kjeldsen. Labrador Kangian´. Kimmernaq Kjeldsen aamma Adam Kjeldsen. Nina Kreutzmann Jørgensen aamma Malik Hegelund Olsen. Alexander Montgomery Andersen.

- Kulturikkut pinngorartitsineq – tassalu eqqumiitsuliorneq eqqumiitsuliornermillu suliaqartut ukiumut ataasiarluta nersualaartarniarpavut, Kommuneqarfik Sermersuumi Kulturimik Siuarsaaneq pillugu Siunnersuisoqatigiit siulittaasuat, borgmesteri Asii Chemnitz Narup-i kommunip kulturikkut avammut nittarsaassisussaanik toqqaanermi tikilluaqqusilluni oqaatsini aallarnerpai.

Kommuneqarfik Sermersuup kulturikkut avammut kiinnertartussaatut Nive Nielsen-ip toqqarneqarnera Kulturimik Siuarsaaneq pillugu Siunnersuisoqatigiit ajornakusoortissimanngilaat. Siunnersuisoqatigiit ujartugaat tassaavoq kulturikkut suliniuteqarnermigut nunatta iluani avataanilu Kommuneqarfik Sermersuumik, aammalu kalaallit kulturiannik avammut nittarsaassisinnaasoq, kiisalu kommunip meerartaanut inuusuttaanullu maligassiuisuullunilu isumassarsisitsisinnaasussaq. Toqqaaneq pillugu Asii Chemnitz Narup-i oqaaseqarnermini ima nangippoq:

- Nalitsinni nipilersortartut nuimanersaasa ilisarnaatigisaat nammineq aamma pigivaa: immikkuullarissuseq, namminerluinnaq nipini ilisarnarluartoq. Qamannga pisumik erinarsoriaaseqarpoq uummatitsinnik attuisartumik. 

Nive-p kalaallit kulturiat ilisimaneqarnerulersikkusuppaa

Nive Nielsen-ip kommunip kulturikkut avammut nittartaassisussaatut toqqarneqarnini nuannaarutigaa, sapinngisanilu tamaat kalaallit kulturiata nunarsuarmioqatigiinnit ilisimaneqalernissaa sulissutigerusullugu.

- Avatitsinni inoqarpoq Kalaallit Nunaat pillugu ilisimasaqarnerulerusuttunik, oqarsinnaavungalu kulturikkut avammut nittarsiissutut inissimalaalereernikuullunga, tassami naapittarpakka inuit qeqertarujussuup angingaartup inoqarneranik ilisimanninngitsut. Pisinnaasara tamaat kulturerput pillugu avammut nittarsaassissaanga, erinarsortartoq Nive Nielsen, Kommuneqarfik Sermersuup kulturikkut nittarsaassisussaatut toqqarneqaqqammersoq tullusimaarluni ilaatigut oqarpoq.

Kulturikkut nittarsaassisussaq toqqarneqarnerminut atatillugu 75.000 koruuninik aningaasaliiffigineqarpoq, kiisalu Frederik Kristensen-ip, Kunngip, ukkusissamik qiperugaanik tunissuteqarfigineqarluni.

Aliikkusersuisut assigiinngitsut

Kommunip kulturikkut nittarsaassisussaanik toqqaanermut atatillugu nipilersorlutik tusarnaartitsipput Nina Kreutzmann Jørgensen aamma Malik Hegelund Olsen, aamma Kimmernaq Kjeldsen, aqqalussaminit Adam Kjeldsen-imit ingiorneqarluni, quisaarutiginnittartut Labrador Kangian´aliikkusersuipput, aamma qitittartoq Alexansder Montgomery Andersen qitilluni takutitsivoq, kiisalu minnerunngitsumik kulturikkut nittarsaassisussatut toqqarneqartoq Nive Nielsen erinarsorpoq, isiginnaartunit nuannarineqaqalutik.

Allattoq assiliisorlu: Else Jensen