Paamiut kusanartumik takutitsigu

Unnuk aliikkusersuinertalik illarnermik erinarsoqatigiittarnermillu akoorlugu ingerlanneqarpoq. Taamatut aaqqissuipput takornarialerinermi Port Readiness-imi pikkorissarnikut Takornarialerinermi siunnersorti Helga Lorentzen suleqatigalugu. Inuit takkuttut naatsorsuutigisamiit amerlanerummata issiavinnik ilioraaqqittariaqarsimavugut. Soqutiginninnerat assut nuannaajallannarpoq.  

Aaqqissuussinerup siunertarivaa Paamiuni takornariaqarnerup siuarsarnissaa umiarsuarnillu takornariutinik tikittoqartillugu niuffanneqarnerulernissaa taamaasillunilu aamma takornarissat Paamiuni nuannersumik misigasaqartitsisarnissaq. Pikkorissaqataanikut ilaasa isummersuutiminnik suullu takornariaqarnermi suliniutaanersut saqqummiuppat. Saqqummiussat ilaat ukuupput:

•    Parkimi kusassaariarluni assassukkanik sanalukkanillu nuisitsineq, nuisitat kusanartuussapput akiminnullu naleqquttuullutik;
•    asimut pisuttuarfissat meeqqat inuusuttullu suleqatigalugit nalunaarsorneqarnissaat;
•    illoqarfik eqqiluitsuutillugu aalakoortullu saqqumitinnginnissaat;
•    meeqqat takornariaqarnermi akuunerutillugit kaammattorneqassapput, tammajuitsunik suliaqarsinnaallutik nuisitsisillutillu;
•    nattoralik ilisarnaatitut atorluarneqarnerulernissaa, ussassaarinermi tammajuitsussanillu tuniniaanermi atorneqarnerulerluni.

Pikkorissaqataasut saqqummiussereermata takornariaqarnermi siunnersorti Helga Lorentzenip Paamiuni umiarsuaqartillugu periarfissaasinnaasunik aamma saqqummiussivoq. Inuit peqatigiiffiillu assigiinngitsut takornariutinik tikittoqartillugu sunik neqerooruteqartarsinnaanerannik siunnersuutinik imalinnik.  Tassani iserfigineqartut ilaat tassaapput kaffillertarsinnaaneq, parkip atorluarneqartarnissaa, isikkamik arsarneq, kiisalu Arnat Peqatigiit Blå Korsillu umiarsuaqartillugu illuminnik ammatitsisinnaappata qanoq iliorsinnanerat, allarpassuillu. Taassuma kingorna soqutigisaqaqatigiit oqallitsinneqarput soorlu peqatigiiffinniittut ataatsimut, sanaluttartut ataatsimut il.il. Tassani eqqartuitinneqarput qanoq iliorusussinnaaneri aasamut 2012-imi takornarialerinissaminni. Taakkualu aamma kingusinnerusukkut isummersuutiminnik tamanut saqqummiussillutik.

Unnuk saqqummiussinerinnarmik ingerlanani aamma aliikkusersuinertaqalaarpoq. Arnat Peqatigiit kaffillerput mamartunillu kaagillerlutik. Erinarsoqatigiittoqarpoq erinarsukkallu ilagivaat: ”Soormiuna aamma Paamiuliaravit?” Paamiuni kalattoortartut aamma pikkoreqalutik takutitsilluarput, tukkartullaqqineri assut takorianut takutikkusunnavippoq. Saqqummiussisut ilaat isiginnaagassiilaarput, tassa kalaallit marluk takornariarlu ataaseq paatsooqaatigiittuusaartillugit isersimasunut qungujutsitsinngitsuunngillat. Naggaserlugu erinarsoqatigeereernermi immikkuullarimmik misigitinneqarpugut; tassami illaqatigiinneq (latteryoga) misilikkatsigu, alutornarluinnarpoq.

Takornariaqarnermi siunnersorti Helga Lorentzen unnuk manna piviusunngortinneqarsinnaammat suleqataasunut tamanut qujarusuppoq. ”Aaqqissueqataasut: Augustine Rosing, Bibi Stenskov, Eigil Knudsen, Else Thorsen, Emilie Lorentzen, Erik Lorentzen, Filipine Møller, Henriethe Boassen, Johanne Hermansen & Ulrik Mathiesen. Arnat Peqatigiit kaffillernerannut, Paamiuni kalattoortartut takutitsinerannut, minnerunngitsumillu soqutiginnillutik takkuttunut tamanut qujanaq. Tamassinnut qujanarujussuaq. Takornarialerinermik arlaatigut soqutiginnittut saaffiginneqqunaqaat aasamut periusissanik pilersaarusioqatigiinniassaagut. Takornariaqarneq Paamiuni tamattaalluta pitsanngortissinnaavarput.” Taamatut naggasiivoq Helga Lorentzen.