Attaveqarfik

Kommuneqarfik SERMERSOOQ Kommunikationsafdelingen Kuussuaq 2
Postboks 1005
3900 Nuuk Tlf.: 36 70 00 Fax: 31 11 51
E-mail: Ammasarfii
  • Attaveqarfik peeruk

Paartoq 2012

Ataasinngorneq januarip 23-ani Paamiuni peqatigiiffiit Peqatigiiffik Qajaq Paamiut aamma Peqatigiiffik Narsalik Takornarialerinermullu siunnersorti Helga Lorentzen ataatsimeeqatigiipput. Tassani aaliangiunneqarpoq siornatigut ingerlanneqartarnikuusoq qaannamik parrunneq Paamiuniit Narsalimmut aqaguanilu uterlugu aasamut qaannamik unammersuarnerup kinguninnguani piviusunngortinneqarumaartoq. Parrunneq katillugu 110 kilometeringajannik takissuseqarpoq ulluni taakkunani marlunni.

Atserneqarnissaa aamma aaliangiunneqarpoq tassa Paartoq 2012. Oqaaseq ”Paartoq” qanga nunaqarfiit illoqarfiillu akornanni ungasissorsuarmut paarlutik allakkisartuusartut taaguutigisimavaat.


Qaannamik unammersuartut juulip 12-ani aallartussaagaluartut parrunnissaq ullulerneqarpoq juulip 14-iani aamma 15-iani. Taamaalillutik peqataarusuttut Paamiuniinnissartik sivitsorsinnaassallugu. Sapaatip akunnerata  naanerani ingerlanneqarumaarpoq taamatullu piumassutsiminnik ikiuussinnaasut amerlanerusinnaallutik.


Paamiuni takornarialerinermi qajarissanik attartorsinnaaneq. Paamiuni aasaru qajarissanik attattortitsisinnaaneq ammaattussaammat nunani allaniit peqataaffigineqarsinnaassaaq naak qajavinnik atunngikkaluarlutik. Qajarissanik paarlutik peqataasussat immikkoorlutik peqataajumaarput sananeqaatai assigiinngeqimmata kalaallillu qajaat pingaarnerutinneqarmata.


Aningaasanik katersuiniarnissaq tapersersuisussanillu ujarlernissaq apeqqutaatillugu akissarsiarititassatut siunniunneqarput qajavinnik paartuni siulleq 20.000 kruunit, tullia 15.000 pingajuallu 10.000 kruunit. Qajarissani siulleq kisimi aningaasanik akissarsitinneqassaaq tassa 15.000 kruunit. Taakku saniatigut peqataasut tamarmik diplominnassapput tammajuitsumillu.


Suliassat piareersaatit aaliangiussorneqarput inuttalersorneqarlutillu. Paartoq 2012  piviusunngortinneqarnissaanik suleqatigiinngortut tassaapput  Johan Rosing, Dina Rosing, Ludvig Kristoffersen, Nuka Josefsen, Peter Lars Lorentzen, Ane Kristoffersen, Sofus Lorentzen, kiisalu Kúnak Lorentzen, siornatigut taanna parrunneq aaqqissorneqaraangat siuttuusarsimasoq ataqatigiissaarisussatut inissinneqarpoq suliassat pissusissamisut ingerlanissaat qulakkeerniarlugu.    


Tekst: Helga Lorentzen.
Foto: Isak Kleist.