Attaveqarfik

Kommuneqarfik SERMERSOOQ Borgmesterip Allattoqarfia Kuussuaq 2
Postboks 1005
3900 Nuuk Tlf.: 36 70 00 Fax: 31 11 51
E-mail: Ammasarfii
  • Attaveqarfik peeruk

Borgmesterip ukiortaami oqalugiaataa

$$FlashVideo(src=Nytaarstale_2010_480x360,w=480,h=360,l=1073);

Asasakka Kommuneqarfik Sermersuumi innuttaaqatit

Ukioq-aasit nutaaq aallartittussanngorparput. Ukioq qaangiuttoq kingumut qiviarluta nalilersortussanngorparput, ukiumilu nutaami inuttut ataasiakkaatut ataatsimoortutullu nutaanik periarfissarsiornissarput sapiiserlutalu atorluaanissaat tullinnguuppoq.

Ukiumi qaangiuttumi pisut
2010 ukioq pisoqarfiulluarpoq pisortatigoortunillu pisorpassuaqarluni.
Julie All Starsit qularutissaanngitsumik ajugaajartuaarnerat sapaatip akunnerni arlalinni tanngassimaarluta pissangallutalu malittarisimavagut. Misigisimanarpoq soorluttaaq erinarsortartut pikkorissut kisimik ajugaanngitsut, kisiannili kalaallit inuiaat tamarmik ajugaasut.
ICC-p Nuummi ataatsimeersuarnera nuannersumik misigisaqarfigaarput. Naggueqativut akilinermeersut aqqusinermi takussaalluarsimapput, kulturikkullu aliikkutassaqartitsinerpassuit oqaluttuarisaanitsinnik kulturikkullu ataatsimoorfeqarnitsinnik uppernarsaasuupput.
Taamatuttaaq Tasiilameersut Amarngivat isumaginninnikkut qasusuillutik suliniuteqarnerminni kunngissakkut nersornaasiuttagaannik nersornaaserneqarmata tulluusimaarutiginissaannut pissutissaqarluarpugut.
Folketingimit aallartitat nunallu assigiinngitsut 56-it allartitaasa tikeraartiginerini kommuneqarfitsinni assigiinngisitaassutsitta nittarsaannissaanut aamma periarfissinneqarsimavugut.

Aningaasaqarneq
Kommunip aningaasaqarniarnera oqallisaasimaqaaq. Periarfissaq iluatsillugu erseqqissarusuppara, aningaasaqarniarnikkut ajunngitsumik inissisimalluta 2011 ikaarsaarfigissagatsigu. Kommunit kattussuunneqarnerisa kingorna siullerpaamik aatsaat taama nalorninaatsigisumik tunngavissagissaarlutalu missingersuusiorsinnaasimavugut.
Sipaarniarfissarsiorlutalu nalimmassaasariaqarsimavugut. Pissusitoqqat malillugit suliaqarniartarneq apeqqusertarlugu siumut eqqarsarluni nutaaliornernik aqqutissiuisimavugut. Illoqarfiit pingaarnersaat, illoqarfiit allat nunaqarfiillu iluaqutissarsillugit naammagisimaarnartunik angusaqarsinnaasimavugut. Missingersuusiorneq kikkorpassuarnik kalluaaviusoq nalornisoorfiusunik pisarialinnilli aalajangiiffiusarsimavoq. Kommunalbestyrelsimili ilaasortat sapiiserlutik akisussaassuseqarlutillu aammalu oqaasissaqaqataassutsip aqqani sinniisitut nukittuutut 2011-mut missingersuusiaq isumaqatigiilluinnarlutik aalajangiuppaat.

Allannguineq nutaaliorluni eqqarsarneq
Ukioq 2011 ukiullu tullii nutaaliorluni eqqarsarneq ilisarnaatigissavaat. Inuiaqatigiittut najugaqarfikkaatullu aaqqissuussaanerput nutaamik eqqarsarnitsigut, namminiileriartornitsinnut aammalu innuttaasut akuutillugit peqataanissaat aqqutissiuutissavagut.
Ukiumi nutaami kissaatigeqaara uagut qinikkatut atorfilittavullumi ilanngullugit allannguilerfitsinni innuttaasunik suliniaqatigiiffinnillu piaartumik angusaqarfiulluartussamik oqaloqatigiissinnaanissarput.
Oqaasissaqaqataanikkut oqaloqatigiissinnaaneq pingaarnertut ilisarnaatigisariaqarparput.

Ileqquliutiinnakkanik eqqarsarnerit qimallugit isumassarsiorluarnikkut eqqasarluarnikkullu nutaanik aqqutissarsiorsinnaaneq aammalu iliuuseqarusussuseqarluni ingerlariaqqinnissaq ajornaatsuinnaananilu sapiiserniarfissaavoq.
Tamanna ilisimasaqarnerulernissamik nutaanillu piginnaasaqalernissamik pisariaqartitsivoq - pisortani suliffeqartuusuni minnerungitsumillu aamma inusuttuni inuiaqatigiinnik ingerlatsitseqqittussani. Suliassaq tamanna pimoorulluinnarniarlugu aalajangersimavugut - 2011-mi siunissamilu.

Naleqartitat
Kommunalbestyrelsimi aalajangerpugut ilinniagalinnik kajumissaasiisalerlutalu innuttaasunut sulilluartunut nersornaasiisalerniarluta.
Tamanna piginnaasanik naleqartitanillu nersorinninniutaavoq, ataqatigiiussutsimut pingaarutilik - ilinniagaqartut suleqatigiissinnaassutsikkut piginnaasaannik nersorinninniutaavoq, inersimasullu najukkani pitsaasumik ineriartortitserusullutik iliuuseqarnerannik tapersiiniutaalluni.
Piginnaanerit taamaattut - iliuuseqarneq suleqatigiinnerlu - pisariaqartippavut, taamaattumillu nittarsaassinitsigut nersorniarusuppavut.

Meeqqat inuusuttullu, atuarfeqarneq ilinniartitaanerlu
Meeqqat tamarmik piginnaasaminnik atorluaanissaminnut periarfissinneqarnissaat anguniagarivarput. Imminnut kikkunnillu tamanik iluaqutissiinissaat eqqarsaatigalugit. Taamaammat aalajangiupparput:
- Meeqqat nukanganerit nunaqarfinni illoqarfinnilu pitsaasumik ulluunerani paarineqarnissaannik neqeroorfigineqarnissaannik qulakkeerinniffigineqassasut
- Meeqqat inuusuttullu pitsaasunik sammisassaqartissinnaassagivut
- Atuarfimmi atuartitsissutitut neqeroorutit pitsaanerulersissagivut - minnerunngitsumik nunaqarfinnut ilinniartitsiartortunik angalatitaqaqqissaagut aammalu alisissumiit atuartitsisinnaajuassalluta, taamalu meeqqat atuarfianni atuartut tamarmik pitsaanerpaanik angusaqarlutik soraarummeersinnaalersillugit.
Najugaqarfinni assigiinngitsuni misilittakkavut pitsaasut aallaavigalugit ineriartortitsivugut, pitsanngorsaanissanillu pisariaqartitsisut akisussaaffigerusuppagut. Pitsaanerulerfissanik pikkorinnerulerfissanillu nassuerutiginnissinnaaneq maligassiuineruvoq - nassuerutiginnissinnaanngikkuttami unneqqaserluttumik inuussaagut siuariartornissarlu pinngitsoortillugu.
Neriuutigaara, ilinniartitsisut pædagollu angajoqqaanik suleqateqarlutik inuusuttut ilinniagaqarnissaannut tapersersuillutillu kaammattuiumaartut. Kikkut tamaasa najugaanni ilinniagaqarsinnaatinnissaat qulakkeersinnaanngilarput, ilisimavaralu nunatsinni ilinniagaqarneq maqaasinermik angerlarsernermillu malitseqartartoq, tamannaliuna naleqarluartumik inuuneqalernissamut aqqutissiuisuullunilu qulakkeerinnittussaq.

Oqaatsit pillugit politikki
Inatsisartut oqaatsinut politikkimik inatsit 2010-mi akueraat. Tamatumani kalaallit oqaasiisa inuiaqatigiinni atuuttussaatitaanerannik qulakkeerinninneruvoq iluatigalugulu qallunaatut tuluttullu piginnaasatigut piginnaanngorsarnissamut periarfissiivoq. Tamanna pimoorukkusupparput kommuunimilu sulisut oqaatsit tungaasigut piginnaasaqarnerulernissaannut periarfissikkusuppagut.
Feberuarip 21-at FN-ip inunnguuseralugu oqaatsinut ullorititaraa. Ulloq taanna immikkut pingaartillugu nalliussissavarput, kalaallisut oqaatsit pisortatigoortumik oqaasiunerat malunnartinniarlugu aammali kikkut tamarmik oqaatsinik arlariinnik atuilersinnaanissaat akueralugu.

Inuussutissarsiuteqarneq
Inuussutissarsiutitigut ineriartortitsineq pisoqarfiusimaqaaq - pingaartumik aallarnisaasoqarnikkut pikkorissartitsisarnikkullu. Kissaatigaarpummi sapinngisamik amerlasuut piginnaasamikkut ineriartornissaat imminullu napatissinnaanissaat. Inuit tamanna kissaatiginerpaasaraat.
Inuussutissarsiutitigut siunnersuisoqatigiinnik 2011-mi pilersitsissaagut, naatsorsuutigaarpullu kommunimi suliffeqarfiit qanimut suleqatigalugit inuussutissarsiuteqarnikkut suli ineriartortitseqqissinnaassalluta. Nunarsuatsinni uuliasiortut aatsitassarsiortullu suliniuteqaleraluttuinnarneranni suli piukkunnarsarnerullutalu periarfissagissaarnerussagutta siuarsarniarlutalu ineriartortitsisariaqarpugut. Uisorerianngitsugulluunniit taama pisoqarsinnaavoq. Sutigut tamatigut kiffartuussiffigisinnasariaqarpagut - akuulluinnarluta peqataasariaqarpugut, taamaanngippammi siuariartornermi allat aqullugulu aalajangersaaffigisaanni isiginnaartuuginnartutut inissisimaleriaannaassaagut.

Illoqarfimmik ineqarnikkullu siuarsaaneq
Siunissami inissaqarniarnikkut illoqarfinnilu siuarsaanermi piorsaaniarluta aningaasaliissuteqarpugut - illoqarfinni nunaqarfinnilu. Tamanna sanaartornermi inerisaanermilu nukittorsaaneruvoq aammalu Kommuneqarfik Sermersuumi siunissamik tunngaviliisuuvoq.
Kusanartuliorsinnaaneq pitsaassuserlu qulakkeerusuppavut, minnerunngitsumillu ilaqutariinnut najugaqarfinnilu pitsaasunik ataatsimoorfeqarnissaq toqqissisimanartunillu avatangiiseqarnissaq pilersikkusuppavut.
Namminersorlutik Oqartussat peqatigalugit Nuummi illoqarfiup qeqqani Tuujuk blok P-mullu taarsiullugit ullutsinnut naleqqunnerusunik sanaartorfiginiarparput. Periarfissatsialak tamanna suleqatissarsiorluta atorluarniarparput - aamma nunanit allaneersunik suleqateqarnikkut.

Nammineq kajumissuseqarluni suliniaqatigiiffiit
CSR - Greenland 2010-mi pilersinneqarpoq. Suliffeqarfiit suliniaqatigiiffiat inuiaqatigiinni akisussaassuseqaqataanerminnik takutitserusuttoq. Tamanna tapersersorusuppara. Meeqqat inuusuttullu pitsaasumik ineriartortikkusutavut angajoqqaaqarput naleqarluartumik inuuneqalernissaannut tapersersortarialinnik. Tamanna ilaatigut suliffeqarfinnik angusaqarfiulluartunik suleqateqarnitsivut qulakkeersinnaavarput, taamalu suliffissaqartitsiniarnikkut periarfissarissaartitsinerulersitsilluta, angajoqqaajusullu piginnaasasigut sulerusussusaasigullu periarfissaqarnerulersitsinitsivut nukittorsaanitsivullu meeqqat inuunerinnerulernissaannut aqqutissiuissaagut.

Suliffeqarfiinnaanngitsut inuiaqatigiinni akisussaaqataanermik takutitsisartuupput. Innuttaasorpassuit kajumissutsiminnik suliniutillit peqatigiinnermut suliniuteqartarput. Soorlu timersornikkut peqatigiiffilerinikkullu suliniuteqartut aamma peqatigiiffinni isumaginninnikkut suliniuteqarfiusut.

Nammineq kajumissutsimik suliniuteqarneq, nammineq ilaqutariilluunniit soqutigisaasa saniatigut ingerlassaqarneq ataqatigiissusermik ataatsimoorfeqarnitsinni tunngavileeqataasarpoq. Pisortat taamaattut pilersissinnaanngilaat, kisianni suleqatigiissinnaavugut. Taamaattumik-una kajumissutsimik suliniuteqartut namminneq suliniuteqarsinnaanerminnut pisinnaatitaaffii ataqqilluinnarlugit iliuuseqarnitsivut tapersiiffigerusukkivut.

Ataatsimiititat assigiinngitsut kommunip illoqarfiini tamani 2011-p ingerlanerani ataatsimiittarumaarput. Naapittarnissarsi qilanaaraarput angusaqarluarfiulluartumillu attaveqatigiinnitsigut ataatsimoorussatut iliuuseriniakkavut piviusunngortittarumaarpagut.


Kommunalbestyrelse sinnerlugu tamassi ukiortaarsiorluarnissassinnik kissaappassi.