Unnuk kulturisiorfik 22.1. 2011

Ukiup taarnersuani issinneranilu illoqarfimmi nuannarisatsinni misigisassat nutaat peqataaffigiumallugit unnussiuaassaagut.
Ilinniarfeqarfiit kulturikkullu suliaqarfiusut matutik ammarpaat immikkut ittunik misigisaqaqqulluta. Suliffeqarfiit silataanit takujuartakkagut taakkutaaq tikilluaqqusipput sunik suliaqartarnerminnik uagutsinnut ilisaritikkumallugu. Ileqqoq ’inuusuttoq’ nuannersorlu!

Suliffeqarfinnut ingerlatsiveqarfinnullu tamanut qujanaq. Piumassutsiminnik suleqataasunut tamanut aamma unnuk manna sulisorpassuarnut qujanaq. Illoqarfiit pingaarnersaanni unnuup immikkorluinnaq misigisaqarfiunissaanut nunaqqatigiittullu alutornartumik naapeqatigiissinnaanissatsinnut inuppassuit ulappussimaqaat, taakku angisuumik qutsavissaraagut.

Nunatta Atuagaateqarfianut qujanaq. Ukioq mannassaaq immikkut ittumik Elisa Jeremiassen qujassuteqarfigissavara - ukiuni aqqanilinngortuni unnuk kulturisiorfiup pilersaarusiorfigineqarnera ataqatigiissarneqarneralu siuttuuffigaat. Suliamik tunniussimanerpit kaperlaap unnuaani ullorissatullusooq uisorilavoq.

Tasiilaq, Paamiut, Ittoqqortoormiit, Ivittuut aamma Arsuk unnuk manna peqatigivaatigut. Kommuneqarfiup allaffiani teknologi nutaaliaasoq atorlugu kommunitsinni innuttaasut ataatsimoortinneqassaagut kulturikkut naapeqatigiilluta illoqarfinnilu allani ilaquttat ikinngutillu isiginnaarutikkut takummaalaarlugit.

Ittoqqortoormiiniit tivasoqassaaq, Paamiuniit rappertoqassaaq Tasiilamiillu erinarsortoqarluni. Nuummi nipilersornermik ilinniarfimmiit nipilersortoqassaaq meeqqallu nipilersoqatigiit nipilersussallutik.

Kingusinnerusukkut isiginnaarutikkut atortorissaarutit (videokonference) atorlugit ilaquttat ikinngutillu kommunerujussuatsinniittut ilassinisssaannut periarifssaqassaaq.

Kommuneqarfiup allaffianut iseqataarusuttut tamassi tikilluaqqungaarpatsigit. Allanut ingerlarusuttunut ilississaaq unnussiorluarnissassinnik kissaappassi.

Taamaatut oqaaseqarlunga unnuk kulturisiorfik ammarpara.